Alberto Barandiaran: «Letra txikiz idazten diren gauzek mugitzen dute benetan mundua»
Pilar Iparragirre
Zer diozu narrazio hauei buruz?
Egia esan, ez dakit oso ondo zer kontatu behar dudan liburu honi buruz. Kazetaria naiz ni, baina batzutan, grabagailua jartzen dudanean, harritu egiten naiz jendeak erantzuteko duen prestutasun horrekin, benetan zaila delako hainbeste jarri duzun liburu baten berri ematea. Dena den, uste dut interesgarria dela azaltzea, ez zergatik idatzi ditudan lan hauek -hori galdera potoloegia litzateke-, baizik nola idatzi ditudan.
Nola sortu zitzaizkizun istorioak, alegia?
Beno, nola iristen diren zirriborro edo ideia batzuk azkenean liburu batera. Nire kasuan irudiak, eskutitzak, obsesio batzuk... izan dira. Halako batean erabaki nuen paperean jarri behar nituela, eta horrela hasi nintzen, jakin gabe oso ondo zer aterako zitzaidan. Nekien bakarra zen buruan bueltan zerabilzkidan irudi horiei buruzko gogoetak kontatu nahi nituela.
Eta Mundu txikia izenburuaren arrazoia?
Uste dut ondo azaltzen duela nik hamalau argazki hauetan ikusten dudana. Metafora bat erabiliz, batzuetan txoratu egiten gara ur biziekin, errekak gauza asko dakarrenean eta oso ikusgarri, ematen duelako hori dela benetan inportantea; baina nik uste dut bidea benetan egiten dutenak ur sakonak direla, eta niretzat korronte sakon horiek askoz gehiago daude eskutitz batean manifestu batean baino; eta begirada iheskor edo berezi batek askoz gehiago esaten du argazki eder batek baino. Hau da, nire iritziz, letra txikiz idazten diren gauzak dira benetan mundua mugitzen dutenak.
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa