Argia astekaria webgunearen hasiera

Ametzagainara Ramoneneatik barna. Zerutik lurrera, Zeruko ARGIAtik ARGIAra Larrun eta Susa barne. Bidai luzetxo baten kronika da idazteko proposatu didatena. Donostiako Okendo kalean, kaputxinotan genuen egoitza. Egin eta Deia sortu izanak erakarri zigun flakiaren erdian ginen. Harpidedunen herena eta publizitatearen bezeriaren erdia galduak genituen jada. Kuatrikromiaz iragartzen zirenak, bezero sendoenak pixkanaka gurea uzten joan ziren egunkari berrietako publizitate orriak hornituz. Astekariak ere ia batera agertu ziren. Berriak, Garaia, Punto y Hora. Gaztelaniak eremu berriak irabazten zituen bitartean, euskarak Anaitasuna hamabostekaria galtzen zuen. Kaputxinoek, Zeruko ARGIA uzteko gogoa adierazi ziguten. Ordurako, gure taldea gaztetzen eta berritzen hasia zen. Gure astekaria abandonatzea, euskaraz eta Euskal Herria osoan argitaratzen zen bakarra, nik dakidala behintzat ez zen inoren burutik pasa. Guk geure gain hartzea erabaki genuen. Prezioa adostu ondoren, kaputxinotatik Egia auzora eraman genuen egoitza. Leihorik gabeko zokoa, ardoak gordetzeko egokiagoa zen hartan gauzatu genuen gure bilakaeraren hastapena. Talde profesionala osatu genuen, ogibidea beste nonbaiten irabazten zuten pertsonekin, proiektu hartan bere onenak eman zituen jendez osatu hain zuzen. Ez zegoen batzuk besteengandik bereiziko gintuen paretik. Komertziala, erredakzioa, administrazioa, guztiak bateratuak genituen. Guztiek genuen guztiaren berri. Batzar permanentea. Osotasuna bizi eta partikularra haren osagarritzat kudeatzea genuen indar. Pertsonen interesak eta taldearenak bateratzean sortzen ziren sinergiek atera gintuen ataka hartatik, zorrak egiteko ere inork gutxik laguntzen gintuenetik. Leihoen freskoa eta eguzkiaren argia gogo, Ametzagainara jaitsi ginen, garai batean gure haurtzaroan Koskas elkarteak zuen egoitzara. Hura besterik zen, gure jantziek jada ez zuten heze zokoaren usainik hartzen eta batzuen asteroko gaupasek kalitatean izugarri irabazi zuten, non etzan eta non dutxatu bertan baitzuten. Dena mejora. Ez dut geroztik holako lan talderik ezagutu. Ez euskalgintzan, ez euskalgintzatik aparte, nahiz eta bestela ere zorionekoa izan naizen alde hortatik nere jardunetan oso talde azkarrak inguratu bainaute.