artikulu nagusira itzuli
Torgom Khudoyan, AYBko lehendakaria: «Gure gazteek tradizioei gogor eusten jarraitzen dute»
Armeniako Yezidien Batzordeko Torgom Khudoyan lehendakariarekin eseri gara, elkarteak Erevanen duen egoitzan. Bera dugu pertsona aproposena Armeniako yezidien egoeraz eta etorkizunaz mintzatzeko.
Zertarako sortu zen Armeniako Yezidi Batzordea?
Armeniako yezidion kultura sustatu eta gure jendearen erreferentzi puntua izan nahi dugu. Gobernuz kanpoko erakundea da, betiere politikaren esparrutik at.
Kanpoko laguntzarik jasotzen al duzue?
Bai. Armeniako Gobernuak bulego hau eskaini zigun eta hilean 50.000 Dram (100 euro) ematen dizkigu Lalesh gure hilabetekaria kaleratzeko. Honetaz gain estatuko irratian egunero 15 minutuko saioa egiten dugu gure hizkuntzaz, eta etorkizunari begira telebista saio bat izan nahi genuke.
Yezidia eta kurdua sinonimoak dira?
Ez, yezidi guztiak kurduak dira, baina ez alderantziz. Kurdu gehienak musulmanak dira, eta guk bakarrik kontserbatu dugu kurdutarron antzinako erlijioa. Egun, yezidiok kurdu guztien %5a besterik ez dugu osatzen.
Yezidi ez diren beste kurduekin zer moduzko harremana daukazue?
Tamalez, ez daukagu harremanik. Musulman kurdu gehienak Nagorno Karabaghen bizi ziren baina, hango gerra eta gero, askok Azerbaianera ihes egin zuen. Egun, gutxi gelditzen dira.
Betidanik Armenian bizi al zarete?
Ez, gure arbasoak Irakeko iparraldetik etorri ziren musulmanengandik iheska. Han dago Lalesh, gure gune sakratua, musulmanentzat Meca litzatekeena edo katolikoentzat Erroma. Turkian zeuden asko ere hona etorri ziren 80ko hamarkadan, hango kurduekiko errepresioagatik.
Umeek kurdueraz ikas al dezakete eskolan?
Turkian ez bezala, kurduera ez dago debekatua. Zenbait eskolek kurduera ikasgai gisa daukate, baina gainontzeko guztia armenieraz irakasten da. Armeniako gutxiengo handiena izanda ere, ez dago azpiegitura nahikoa behar hauek asetzeko.
Sobietar Batasuna erori zenetik aldaketa asko somatu al duzue?
Bai, lehen egoera askoz ere hobea zen. Sobietar Batasuna sortu zenetik kurdutar ordezkariak izan ditugu Armeniako Parlamentuan. Bestalde, egun kaleratzen den Rya Taza yezidi egunkaria 1936tik kalean egon da etenik gabe, eta beste edozein herrialdetan baino askoz ere argitalpen gehiago kaleratu dira gure hizkuntzaz. Oraingo egoera ekonomikoarekin zaila izango da honi guztiari eustea.
Zer ordezkatzen du zuen banderak?
Eguzkia eta Malak Taus aingerua, gure erlijioagatik; gorria X. mendean gure arbasoek arabiarren eskuetan jasandako sarraskiagatik, eta txuria purutasunaren kolorea delako. Yezidi guztion bandera da.
Nola ikusten duzu zuen etorkizuna?
Milaka urtetan gure bizilagunen errepresioa jasan dugun arren, gure gazteek tradizioei gogor eusten jarraitzen dute.
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa