Argia astekaria webgunearen hasiera

"Bozkatzera niazu, alegera gabe". Nire baietza hotz eta motz joanen da. Testua ikertu ahal nuen heinean, astoa bezain luzea baita. Iduri zait aitzinamendu txiki batzuk proposatzen dizkigula: botere gehiago Parlamentuari, lehendakaritza luzeagoa, kanpo arazoetako ministroa, arartekoa...

Liberalismoari dagokiola, jadanik hor dugu, baina jokozain batzuk zelaian sartzen dizkio testuak, joko basatiaren pixka bat zuzentzeko.

Europako herritar -citoyens- egiten gaitu, horretan Estatuaren monopolio jakobinoa gaindituz. Estatuaren boterea hein batean murrizten du, ahalmen batzuk Europari utziz. Hizkuntza guztien eskubidea bermatzen du teorian, baina denak ofizial egin gabe.

Europako erakundeetara jotzeko ahala ematen digu...

Gauza guti? Gaurko ezdeusa baino zerbait gehiago agian.

Ezetza emanez, oraingo ezerezean egotea hauta nezakeela iduri zait. Baina jakina, Europak ez digu arazorik konponduko. Kirol zelai berri bat eskaintzen digu, Estatukoa baino zabalagoa, jokozain ageriekin, erregela argiekin. Haatik, epaileak ezin du golik sartu: guri dagokigu lan hori.