Azkenaldian deslokalizazioa terminoa purian dago Europako informazio ekonomiko eta sozialetan, eta Euskal Herrikoetan bereziki. Baina zer da deslokalizazioa? Hain termino berria izanda, hiztegi tradizionaletan ez dator, jakina. Alabaina, ekonomiaren bilakaeraren eguneroko errealitateak irakatsi digu edukia deskubritzen. Deslokalizazioa diogunean, herrialde bateko enpresa bat ûinstalazioak eta produkzioaû lekuz aldatu dela esan genezake. Kasu horretan, enpresen deslokalizazioa izango dugu. Baina, orobat, produkzioak ere deslokalizatzen dira: hala gertatzen da enpresa batek bere instalazioak herrialde batean mantentzen dituenean, baina produkzioa beste batera eramaten duenean. Enpresen zein produkzioen deslokalizazioen jatorrian, normalean, beste herrialde batzuetako baldintza "hobeak" daude: kostu laboral apalagoak eta produktibitate handiagoa. Gaur egun, Europako ekialdeko herrialdeak eta Asiako batzuk dira deslokalizazioen onuradunak. Bakarrak ez badira ere, enpresa multinazionalak dira, eskuarki, deslokalizatzaile handienak, zein alderik alde ibiltzen baitira. Euskal Herrian bertan, Iparraldean nahiz Hegoaldean, gertatu dira dagoeneko multinazionalen deslokalizazioak, eta beste batzuk baliatu dute mehatxu gisa, langileek lansari apalagoa eta lan-denbora luzeagoa "irents" dezaten.