Lan Harremanen Kontseilua (LHK) EAEko instituzio bat da, eta sindikatuen eta enpresaburuen konfederazioek izendatutako pertsonek osatzen dute paritarioki. Bi xede ditu: aipatu konfederazioen arteko elkarraldiak eta dialogoa sustatzea batetik, eta gai soziolaboraletan Eusko Jaurlaritzaren eta Legebiltzarraren organo kontsultatiboa izatea, bestetik. Erakunde bitarikoa eta paritarioa da. Hamalau kide efektiboz osatua dago eta beste horrenbeste ordezkoz: zazpina lagun izendatzen dituzte sindikatuen eta enpresen konfederazioek (enpresen kasuan, denak Confebaskek). Aipatuez gainera, lehendakaria eta idazkari nagusia dauzka, kideek berek izendatuak edota Eusko Jaurlaritzako lehendakariak subsidiarioki. Beraz, 16 kide guztira. Indar sozialen elkargune izateko organoa denez gero, honako funtzio hauek ditu, besteak beste: indar sozialen lanbide arteko akordioak faboratzea, negoziazio kolektiboa sustatzea eta, gatazka laboraletan, adiskidetzea, bitartekaritza eta arbitrajea bultzatzea. Instituzioen partizipaziorako instantzia den neurrian, organo horren egitekoak dira, halaber, Eusko Jaurlaritzari politika laboralari buruzko proposamenak helaraztea eta gai horri dagozkion diktamenak, ebazpenak txostenak eta estudioak egitea.