Argia astekaria webgunearen hasiera

Ipar Euskal Herrian hobeak dira dibortziatzeko orduan legeak eskaintzen dituen baliabideak. Hala diote Kidetzako langileek. Hain zuzen ere, Frantzia aitzindari izan zen Europa osoan zaintza partekatuaren alde egiten, 2002an onartutako legearen bidez. Lege horrek zaintzaren kontzeptua desagerrarazi eta guraso-aginte partekatua finkatu zuen. Aldeen arteko desadostasuna dagoenean ere, zaintza partekatua arautzen du epaileak eta gatazka egoeretan kasua bitartekaritzara bideratzen du. Gainera, Espainiako Estatuan ez bezala, Frantziako Gobernuak hilean 900 eta 960 euro arteko konpentsazio-pentsioak ematen ditu.

Europan ere, bitartekaritza bezalako prebentzio zerbitzuen eta zaintza partekatuaren aldeko joera geroz eta nabarmenagoa da. Europako Batasuneko Familiaren ministro-ordeak adierazi duenez, familiarekin zerikusia duten gaiak estatuetan batzera joko dute eta Kidetzan espero dute Espainiak ere eredu hori jarraitzea. Europatik at, Ameriketako herrialdeetan orokorrean dibortziatzeko bitartekaritza erabiltzea ohikoa da. Hona, handik iritsi zaigu zerbitzua. Bereziki Hego Ameriketan bitartekaritzaren garrantzia nahiko barneratua dute eta Argentinan, esaterako, psikologoen erreinuan, bitartekaritza institutuak oso garatuak daude.