Argia astekaria webgunearen hasiera

Gerard Bidegainberri, donibandartu urdiñarbetarra. Barnealdekoa izanik, bortu gizonarena baino itsasoan ezagutu diot bere zaletasun agerikoena. Arraunketa. Hiru bat urte izango dira Irungo Santiagotarrak antolatu estropadan, Bidasoa gaineko Pausuko zubitik ikusi nuela arraunean, bera gabe nekez aurrera egingo zuen Ur Jokoren traineruak. Istriborretik zihoan erdialdean, arrauna uretik pasatu eta ateratzean ezker sorbalda kareletik hurbil, tente mantentzeko ahaleginetan. Berrogei urteak aspaldi xamar beteak zituen ordurako, hala ere, arraunlari eskasiak ordaintze aldera ez zuen dudarik eginen hutsa zegoen tosta okupatzeko. Eta jo eta ke arituko zen birikak lehertuko bazituen ere. Donibaneko badian aldiz, bere mutilen jarduna motorretik jarraituko zuen kronometroari begia kendu gabe. Ur Jokon bezala, abertzale mugimenduan zuen bere gustuko ontzia, AB, eta nekez ezagutuko genituen, Xubero gabeko bilerak, kanpainak, manifak, martxak. Beti tente zut. Ni baino lagun minagoak bazituen, Eltzegor gure taldean bertan Pantxoa bereziki. Clairvauxeko kartzelan ere badu bat, oso mina, bizi den artean ahantziko ez duena. Izan ere, hori izan dugu Xubero, berezia, ahanzturak deusez ezin lezakeen horietakoa.