Miguel Sanz Nafarroako Gobernuko eta UPNko lehendakariak berriz luzatu die desafioa bere alderdiko afiliatuei: martxoaren 13ko kongresuan ontzat ematen badira UPNko lehendakariorde Rafael Gurreak eta Jose Cruz Lapazaran idazkariordeak aurkeztutako proposamenak, berak uko egingo dio UPNko lehendakari izateari. Gurreak eta Lapazaranek beren karguetarako pertsonak 200 lagunez osatua dagoen UPNko Kontseilu Politikoak proposatzea nahiko lukete eta ez alderdiko lehendakariak (Sanzek), adibidez, edota Kontseilu honek bakarrik erabaki dezala hautes zerrenden osaketa. Sanzek æeredu asanblearioaæ deritzo horri -«Batasunaren eredua»- eta ordagoa jo du. Aurten bertan, UPNren Kontseilu Politikoaren danbateko gogorra hartu zuen Sanzek, bere hautagaiari muzin egin eta Javier Pomés hautatu zuenean Europako Parlamenturako zerrendaburu.
Nafarroa Baiko Barkosek gola sartu dio UPNri
Medinaceli-Soria-Tutera bidea autobia izango da eta ez autopista, hori da Espainiako Kongresuak onartu berri duena. Nafarroa Baiko Uxue Barkos diputatuak bultzatutako proposamena izan da eta jokaldia borobila atera zaio: Kongresuko talde guztiek onartu dute eta, beraz, PPren talde barruan dauden UPNko diputatuek ere bai. Edozein eratan, UPNk danbatekoa jaso du, berak ere bere garaian autobiaren aldeko jarrera agertu zuelako, baina PPren Espainiako Gobernuak autopistaren eredua inposatu ziolako.
De Villepin, Frantziako barne ministroaren bidaia antzua
Halako batean etorri da De Villepin Frantziako Barne ministroa. Berak besapean ekarriko zuenari buruzko esperantzak askotakoak ziren, baina azkenean etsipena nabaria izan da. Galdegindako gai batzuk ia aipatu ere egin gabe utzi zituen Barne ministroak eta esandakoekin berriz, inor gutxi gustura. Euskararen ofizialtasuna ukatu zuen eta IPEren sorrerari buruz aritu zen. Hizkuntza Politikarako Bulego Publikoari buruzko zehaztapen gutxi eman zuen eta aurrekontua uste baino murritzagoa; 600.000 euro beharrean 520.000 euro. Euskarazko irakaskuntza alorrean hitzarmena sinatu zuen ministroak, baina Hiru Sareta-k (Seaska, Euskal Haziak eta Biga Bai) adierazi du ministroaren bidaia aurrerapausoa baino atzerakoa izan dela. Hiru Saretak abenduaren 11rako manifestazio deialdia egina du.
Hiztegiak poltsikoan
Eskuko hiztegia izeneko egitasmoan garatutako tresna, eskuko ordenagailu txiki bat da. Ordenagailuan Euskal Hiztegia, Sinonimo Hiztegia, Hiztegi Batua eta Hiztegi Modernoa daude kargatuta eta edozein tokitan eta momentutan kontsulta daitezke. Ordenagailuaren pantaila txikitxoan informazioa erraz irakurri ahal izateko Internet bidez konektatzeko web orrialde berezia prestatu dute. UEUk abian jarritako Hiztek masterreko Urtza Iturraspe ikasleak garatu du proiektua EHUko IXA taldearen zuzendaritzapean.
Ohorezko euskaltzainak eta Txillardegiren ezetza
Hamaika ohorezko euskaltzain izendatu ditu Euskaltzaindiak eta horien artean Jose Luis Alvarez Enparantza, Txillardegi. Ez du onartu, ordea, izendapena eta orain daukan euskaltzain mailan aldaketarik ez duela nahi esan du. Urgazlea da 1957tik eta hiru aldiz proposatu zuten euskaltzain oso izateko: 1980an (Patxi Altuna aukeratu zuten), 1987an (Juan Mari Lekuona) eta 1988an (Ibon Sarasola). Txillardegik Berriara bidalitako eskutitzean dioenez: «Euskal Herriak eta euskarak berak badaukate ohorezko izendapen hauek baino kezka iturri larriagorik».
Segidakoak dira beste ohorezko euskaltzainak: Pello Apezetxea, Koldo Artola, Federico Barrenengoa, Josep Camino-Hasquet, Jean-Baptiste Dirassar, Joseba Intxausti, Jon Lopategi, Patxi Oroz, Jean-Baptiste Orpustan, Karmele Rotaetxe.
Euskarazko jostailuen Gida 2004
Urtxintxa Eskolak Gidaren 4.000 ale argitaratuko ditu Durangoko Azokarako. Euskarazko jostailuen zerrenda eta fitxa jasoko du gidak eta iazkoen zerrenda ere bai. 2003 eta 2004ko CD-ROMak ere bertan izango dira. Jostailugintzako ekoizleak eta dendak ezagutu nahi dituenak ere hor aurkituko ditu.
EAEko aurrekontuak gori-gorian aurtengoan ere
Aurrekontuen negoziazioen emaitzetan, aurtengoan UAko Enriqueta Benito irabazi du gobernu hirukoak. Horrek 37nako enpatea ekar dezake, SAk taldean edo banaka abstentziora jotzen ez badu. Ez da kopuru nahikoa aurrekontuak aurrera ateratzeko, baina Eusko Legebiltzarreko araudiak, bozketa hiru bider egitea ahalbideratzen du enpateak errepikatuz gero, eta horrek esan nahi du balizko ezezkoaren edo baiezkoaren blokeetan parlamentario bakarrak ere ezin duela hutsik egin, bestela balantza alde batera edo bestera desorekatuko litzateke. Azkenean, enpatea nagusituko balitz, Jaurlaritzak bigarrenez luzatu beharko lituzke Jaime Mayor Orejak ospetsu egin zituen 2003ko aurrekontuak.
Deserosotasuna Arrasateko kooperatiba askotan
Lege Oharra
RSS sindikazioa 