Argia astekaria webgunearen hasiera

Ikaragarri eszenifikaziotan. Edozein dela ere zioa, espektakuloaren kodea erabiltzen edonoren pare gaude. Inguratzen gaituzten futbol elkarte biak ere, uztaileko aurkezpenetan ditugu azkarrak, itxaropenak sortzeko unetan indartsuak. Baina gero jokoan asmatu behar da, partidak irabazi behar dira. Eta igandero azterketa dutenez, irabazi ezean aldakuntzak behar dira. Taktikoak, estrategikoak eta giza baliabideak behar dira aldatu. Eta eszenifikatu, jarraitzaile leialak leial izaten jarrai dezaten. Batasunak iragarri du aldakuntza estrategikoa, aurreko astean ezagutzen ditudan Batasuneko kideak eskandalizatzeko moduko oinarriak aldarrikatuz. Bakea egitea zailagoa omen gerra baino. Gerrak galdutakoen seme-alabek badugu horren berri. Hemen zailena irabaztea dugu. Gerran eta bakean. Eta gerrak ez baldin badigu garaipena ekartzen, bestela jokatu beharko dugu derrigorrez. Baina hori besterik da, beste kirol bat. Entrenatu ez dugun joko bat. Iparraldean eta Nafarroan Batasuna deitu prozesuek ahuldu gintuzten. Aitor diezaiogun gure buruari, ibilitako bidea desibiliz zintzoki. Azkartuko gaitu. Jokalarietan dut nik ikusten arazoa. Ez ditut jotzen horretarako egokiak, estrategia berria aurrera eramateko gai. Eta nahiago oker banengo.