Argia astekaria webgunearen hasiera

Artearen esparruan euskararen presentzia areagotzea eta arteak Euskal Herrian duen egoera aztertzea dute asmo Udako Euskal Unibertsitateak (UEU) Donostiako Euskararen Patronatuarekin batera antolatu dituen Manifestaren ondoren: Artearen egoera Euskal Herrian jardunaldiek. Azaroaren 24tik 26ra, Donostiako Ernest Lluch kultur etxean bilduko dira hainbat artista eta aditu, Miren Jaio, Ibon Aranberri, Asier Perez eta Miren Eraso esaterako, Euskal Herriko artearen diagnosia egiteko.

Musika, dantza nahiz zinemaz gozatzeko parada izango da asteotan Bilbon. 22tik 27ra Bilbao Acción Rock (BAR) jaialdia egingo da. Iaz udan karpapean hogeita hamar bat musika talde izan ziren bi egunez. Bigarren edizioa ez da hain oparoa izango iazkoan izan zen defizitaren ondorioz. Dena den, izango da zer ikusi: film laburrak, mahai-inguruak, kontzertuak... Música Ex Machina jaialdiak ere ekitaldi mordoa eskainiko du azaroaren 24tik abenduaren 18ra: azken kultur joerak erakutsiko dituzte Alan Vega musikariak, Julie Nioche dantzariak nahiz Samon Takahashi artistak. Zinema Dokumental eta Laburraren Bilboko Zinebi Jaialdiaren egitaraua ere ez da makala. Hilaren 29tik abenduaren 4ra, 90 herrialdetako 2.311 film proiektatuko dira. Zinema Dokumentak eta Laburraren Bilboko Zinem

Larunbatean, azaroak 27, egingo da Donostiako Kursaaleko Ganbara aretoan Nazioarteko Trikitixa Jaialdia. Bertako trikitilariez gain, Italiko, Quebeceko eta Kantabriako soinu-jotzaileak ere arituko dira taula gainean. Bestalde, Joxe Lasa Axeigorri, Joxe Mari Soraluze, Epelde , Bittor Gurrutxaga, Bitoriano Loiola eta Mario Serrano gerraosteko trikitilari gipuzkoarrak omenduko dituzte.

Hamargarren urtea betetzen dute aurten Mutrikuko Goizeko Izarra taldeak antolatzen dituen Antzerkiaz Blai jardunaldiek. Igandea bitartean talde amateurrek, batez ere, eskainiko dituzte emanaldiak. Esaterako, Mairuk eta Zurriola ikastolako Biga taldeak.

Anuntxi Arana antropologoak Mitoen bilakatzea. Akaberak eta iraupena liburuan plazaratu du Gatuzain argitaletxearekin.

Edu Zelaieta poetak eta Beñardo Goietxe eta Raul Garcia musikariek Mugaldekoak: poemak, kantuak eta kantupoemak ikuskizuna sortu dute, Zelaietaren Mugaldekoak poema liburua abiapuntu hartua. Muga fisiko nahiz psikikoak ardatz dituen lana abenduaren 11n ikus ahal izango da Errazkinen.

Roberto Castón zinegile eta Bilboko Zinegoak Zinemaldiaren zuzendariak Maricón laburrarekin Espainiako Estatuko film labur onenaren saria jaso du Madrileko Zinema Gay eta Lesbikoaren Jaialdian. Urtarrilean Zinegoak Zinemaldian ikus ahal izango da, lehiaketatik kanpo.

Karidadeko Bentak beste lan bat plazaratu du: Amore, amore (Gaztelupeko Hotsak). Ekialdeko doinuei, meditarreo itsasoko doinuak gehitu dizkiete, dantzarako gonbita eginez.

Joseba Azkarragak eta Migel Mari Elosegik irabazi dute Julen Zelaia IV. saiakera saria, kooperatibismoari buruzko Diruak behar luke bihotzik eta Hartzak Pirinioan XXI. mendean lanekin. Saria partekatuko dute bi idazleek.

Luis Peña Gantxegik honakoa esan zion Berriari: «Ez dut uste eskultore batek arkitektura egin dezakeenik. Izan liteke ideia bat, bide bat, eskulturetan jada bazegoena. baina arkitektura... Oteizak, azken urteetan, gaizki erabili zuen bere eskultura. Sinetsita nago eskultura abstraktua bakar-bakarrik natura erdian egon daitekeela».

Mikel Jauregi poeta bisuala El Paísen: «Sormena edo sentikortasuna duen jendea frustratu egiten da orri bat idazten hasten denean eta esan nahi duena islatuta ikusten ez duenean. Idazteko edo margotzeko balio ez dutela pentsatzen bukatzen dute. Alabaina, sormena barruan dute. Falta zaiena adierazi ahal izateko kodea da. Poesia bisuala edonork egin dezake, baina ideia ezin du edonork izan».

Martin Ibarbiaren hitzok jaso zituen HABEk: «Badakit garestia dela, baina beste kate eta hizkuntzekin homologatuko bagara, euskarazko fikzioa egin behar da (ETBn)».

Iñigo Arbizak adierazpenok egin zituen operaren inguruan Kaleidosen: «Antzokiak beti betetzen direnez, bada garaia erakundeek genero honen aldeko apustua egin dezaten eta emanaldiak sustatzen dituzten elkarte lirikoak lagun ditzaten».