Argia astekaria webgunearen hasiera

Teoria ekonomikoan, diruaren prezioa bezala definitzen da. Zordunak kredituan jasotako kapitalaren ordainetan hartzekodunari (gehienetan, bankuak edo aurrezki-kutxak) zorraren printzipala bihurtzeaz gain, ordaindu beharko lizkiokeen kopuruak kuantifikatzeko modua da. Interes bakuna edo interes konposatua izan daiteke. Interes-tasak entitate finantzarioen likideziaren eta agintari monetarioen aurreikuspenen arabera fluktua dezake. Orain, Europako Batasuneko 25 estatuentzako agintaritza monetarioaren egoitza Europan dago, eta Europako Banku Zentralak erabakitzen du. Interes-tasa hori hainbat txikiagoa izango da zenbat eta handiagoa den likidezia eta zenbat eta handiagoa den produkzio-jarduera edo krisi baten ondoko errekuperazioa bultzatzeko asmoa. Une honetan, interes-tasak behetik dabiltza. Operazio-moten arabera, ezberdintasun handiak izaten dituzte interes-tasek. Hala, izan daitezke edo finkoak, denboran zehar aldatzen ez direnean, edo aldakorrak, Libor edo Mibor tasaren oinarrizko erreferentziaren arabera. Hurrengo zenbakian azalduko ditugu tasa horien kontzeptuak.

Pasqual Maragall Generalitateko lehendakariak jakinarazi duenez, Kataluniako patinen gaineko hockey selekzioak Espainiakoaren aurka jokatuko balu, berak gogor egingo luke Kataluniakoaren alde eta gainera Espainiakoari irabaziko liokeela uste du. Kontua da Kataluniako hockey selekzioak B mailako Munduko Txapelketa irabazi berri duela eta aurrerantzean kirol honen goreneko mailan arituko dela, horrek Espainiako Selekzioarekin jokatzeko ateak zabaldu dizkiolarik. Selekzio autonomikoak ardatz hartuta, PPk jadanik azalpenak eskatu dizkio PSOEren Madrilgo Gobernuari.

Berriz espetxeratzen badute zerbait larria egingo duela jakinarazi du Rafael Vera Segurtasun estatu idazkari ohiak, El Pais egunkarian idatzitako artikuluan. Zenbait informazioren arabera, Verak heriotzarainoko gose grebari ekitea du buruan. Segundo Marey auzia medio, Verak 10 urteko espetxe zigorra jaso zuen, baina espetxean zortzi hilabete besterik ez zuen egin.