Argia astekaria webgunearen hasiera

Zarautzek eta Oriok lotura zuzena izan dute betidanik itsasoarekin eta gaur egun bestelako gizarte eta ekonomia sektoreek indarra hartu badute ere, itsasoa da bietan ezaugarri nagusi.



Ildo horretatik, Itsasoaren Hamabostaldia ekitaldi zikloa aurkeztu zuten maiatzaren 25ean. Zikloak hiru ekitaldi nagusi izan zituen: Bertso Txanpa, Itsasoaren Eguna eta Hitzaldiak.



Maiatzaren 29an Bertso Txanpa jokatu zen Orion, Orioko ibaian. Orion arrauna izan da kirol ezaugarria eta ohiturazko jarduera hori eta bertsolaritza uztartzeko ekitaldi berezia izan zen.



Ekainaren 13an, Itsasoaren Egunean itsasoko produktuak izan ziren protagonista Zarautzen, parrillan erretako sardinak eta txitxarroak, marmitakoa eta piperrada eta itsas produktuekin prestatutako pintxo bero eta hotzak izan ziren dastatzeko. Hori guztia girotzeko trikitilariak, dultzaineroak, txistulariak, bertsolariak eta kale animazio ugari izan zen Zarauzko kaleetan.



Azkenik, zikloaren hirugarren atala osatzeko, lau hitzaldi egin zituzten Orion eta Zarautzen maiatza eta ekaina bitartean, hirurak ere itsasoari buruzkoak. AZTIko Haritz Arrizabalaga eta Hilario Murua mintzatu ziren Itsasoa, eraginik ba al du gugan? galderari erantzunez. Albaola elkarteko Xabier Alberdik eta Xabier Agotek, berriz, Orioko ontzigintzaren historia. Mutiozabaltarrak izan zuten hizpide. AZTIko Irene Gartziak Azpi erabilitako arrain espezien birbalorapena hitzaldia eskaini zuen, eta Elhuyarreko Eneko Imazek Petrolioa, gai likatsua izenburu zuen solasaldia ekarri zuen.