Kazola zabal batean gurina eta 2 koilarakada olio jarriko ditugu, eta su motelean berotu dadila. Gero tipulina, porrua eta uraza edo letxuga gehitu eta frijitu daitezela 5 bat minutuz, baina gorritu gabe. Ur beroa eta salda pastilla erantsiko ditugu gero. Gazitu. Orduan ilar izoztuak gehituko ditugu eta beste 5 minutuz utziko ditugu irakiten, borbor handian. Dena iragazkitik pasarazi eta salda bereiziko dugu egositako barazkietatik. Aparte, bada, hoztu dadila dena hozkailuan. Ongi hoztutakoan, barazkia irabiagailu baten basoan sartu eta indar bete-betean txikitu, pixkana-pixkana salda hotza gehitzen dugun bitartean. Belar freskoak ere gehituko ditugu, baita gazta eta gelditzen den gainerako olioa ere. Gatzik behar badu, eman. Zopa sobera lodia ateratzen bada, izotz koxkor batzuk gehitu eta irabiatu, zopa mehetzeko eta are gehiago hozteko.
Zopa fin-fina gelditzea nahi badugu, iragazkitik pasaraziko dugu. Zopa-ontzian zerbitzatu dugu, edo katiluetan zuzenean. Koilarakada bat jogurt naturalen gainean jarrita, ezin ahaztuzko platera da.
Fruitu lehorrekin erabilitako sistema bera da. Mikrouhin labean eduki segundo batzuez, indar bete-betean. Horrela gailetek eta biscotteek hartzen duten hezetasuna aterako diegu. Ongi dakigu zer txarrak izaten diren gailetak-eta bigunduak daudenean. Esan bezala jokatuz gero, deus ere bota beharrik ez dugu izango, zorro bat irekita aurkitzen dugunean armairuaren hondoan. Berdin-berdin egin daiteke ogi-mokoekin, flautekin edo okindegiko beste zenbait produkturekin.
© 2008-2011 Argia.com - Komunikazio Biziagoa
Kultura 
