Argia astekaria webgunearen hasiera

Monogamia da mundu osoan bikote bizitza arautzen duen modu nagusia. Hala da behintzat Mendebaldean. Eta poligamiaz hitz egiten entzuten dugun bakoitzean Afrikara edo herri musulmandarretara begira jartzen gara. Baina kontua da ikerketek frogatzen dutela gizonezkoen %85ak nahiago lukeela emazte bat baino gehiago izatea. Eta hala ere, Espainian Kode Penalak zigortu egiten du bigamia espetxearekin. Espainian bizi diren atzerritarrek poligamia praktika dezakete, baina beti ere, ezingo lituzkete Espainian euren ezkontzak legeztatu. Ezkontzeko, Espainian, libre izan behar du batek.



Zerbait exotikoa dirudien arren, poligamia «informala» herri guztietan ematen den fenomenoa da. Poligamia modu ezberdinak daude: emakume askorekin ezkontzen den gizonarena; gizon ugarirekin ezkontzen den emakumearena; eta emazte askok aldi berean senar askorekin harremanak dituzten erlazio poligamoak ere badira. Dirudienez, hiru modu horien artean ugariena lehenengoa da.



Gizarte poligamoetan familiako kide bakoitzak dituen rolak oso ongi antolatuak daude: gizonezkoak ezin du dituen emazteen artean ezberdintasunik egin; emakumeen artean jerarkia handia egoten da, egin beharreko lanak modu eraginkorrean banatzen dituzte euren artean eta mesedeak elkar trukatzen dituzte senarrarekin gau bat pasatzearen truke, adibidez.