Argia astekaria webgunearen hasiera

Sekula ikusi dudan lore zurizko erramillota ederrenari begira, udaberriaren zuriarenak izaten diren egun gutxi horietan gaudenaren irudipena izan dut. Sahats hotz zaleen garai sonatua baino zuriagoa zait hau. Mendi magalak elur-sarobez pinportatzen dituzten gereziondoen petalo xintoistak eta errio-bazter eta erreka-zuloetako makalatarrak zuritzaile.
Populus generoa da makala jendea, sahats eta zumeen lehengusinak. Hogeita hamabost bat espezie ezagutzen dira, ipar hemisferioko lur fresko eta epeletan gehienak, hegoaldekoena Tanganika aldeko bat da. Makala edo zumar beltza (Populus nigra) burzuntza, busontza edo lertxuna (Populus tremula) eta zurzuria edo zumar zuria (Populus alba) dira gurean ezagunenak.
Populus genero hau duela ehun bat milioi urte, Behe-Kretazeoan agertu zela uste da; oraindik bizi den genero baten ezaugarri zehatzak dituen fosilik zaharrena Populus primaeva da, agidanean. Ez naiz harritzen, ugaltzeko erraztasun ikaragarria dute. Hibrido kolonizatzaileagoen bila, sexuen nahasketatik ufadetan zaldizka datozen hazien kardilaun arinen emana, desditxa bihurtzen da haizearen geltokietako bazterretan. Sexuen premiarik gabe ûondo moderno!û aldaxkatik, adar-aldaxkatik, probenatik, mentutik, zainetik, ondotik, altsumatik, ipurditik, urtadarretik... klan klonikoak etengabe hedatzen dira. Dakitenek diotenez, Asia ekialdea eta Ipar Amerika hamaikagarren aldiz konkistatzen ari omen dira. Azkar hazten dira, buelo galantak osatuz; ur-amorrazioa du arma onena eta oldarkor eta erasozale egin ditu, kaniletako ura agortzeraino. Hau bai gerra, egun batzuetan zuria.

Consumer aldizkariak azterketa bat egin du, tatuajeak eta piercing-ak egiten dituzten establezimenduetako baldintzak aztertuz. Madril, Malaga, Bartzelona, Murtzia edo Valentziako hiriburuetako zentroez gain, Euskal Herriko establezimenduak ere bisitatu zituzten Consumerreko teknikariek, emaitza kaskarrak lortuz. Horrela, Bilboko zentroen artean %25 dira baleko emaitza lortu dutenak, eta Gasteizen %26. Donostian, ordea, zortzi establezimendutan izan dira (bost soilik propio horretarako jarriak, eta beste hiru gainerako edertasun eta estetika-tratamenduak ere eskaintzen dituztenak), eta bakar batek ere ez ditu gainditu aldizkariak aztertutako oinarrizko puntuak: laneko eremuaren baldintza higieniko-sanitarioak batetik, eta erabiltzaileari emandako aholkuak eta informazio orokorra, bestetik.
Donostiako establezimenduetan, Consumerrek dioenez (niri ez baitzait oraingoz horrelakorik egitea bururatu ere), ez zegoen lanerako eremu bereziturik, ez zegoen areto esterilizaturik, ezta leku gehiegirik ere. Dena den, alde onak ere aipatzen dira txostenean: lekuak garbi zeuden, desinfektatzeko errazak ziren, eta laneko tresna guztiak behar bezala esterilizatuta eta gordeta zeuden.
Bezeroek jasotzen duten informazio eta aholkuei dagokienez, informazio falta da araua. Tatuajea edo piercing-a jarri aurretik pazienteari ez zaio galdetzen ea zauriak ixteko arazorik, gaixotasun edo alergiarik ba ote duen, eta tatuaje bat egiteak edo piercing bat jartzeak ekar ditzakeen arriskuei buruzko oso argibide gutxi ematen da ia zentro guztietan.
Nire ustez, modaren kontra joatea baldin bada ere, praktika horiek arriskutsu samarrak dira, eta osasun eta higieneari buruzko baldintzak zorrotz bete ezean, alergiak edo arazo larriagoak izateko arriskua ere badago.