Argia astekaria webgunearen hasiera

LAB sindikatua gehituz joan da bere afiliatu eta ordezkarien kopuruan, eta, aldi berean, Euskal Herriaren Iparraldean nahiz Hegoaldean presentzia eta ordezkaritza dituen lehen sindikatu abertzalea da. Gaur egun, 34.500 lagunetik gorako afiliazioa du, eta kongresurako espero dute 35.000 laguneko kopurura iritsiak izango direla. Horrek esan nahi du %6 baino gehiago hazi dela 2002. urtearekin alderatuz. Bizkaian ditu afiliatu gehien (12.957); Ipar Euskal Herrian, berriz, %9,84 ditu. Nabarmentzekoa da, halaber, afiliatuen %13 (4.532) gazteak direla, eta %31 (10.636) emakumeak.

LABen ordezkari-kopurua ere pixkana handituz joan da. Horrela, 2003ko abenduaren 31n, sindikatu abertzale horrek 3.954 delegatu zituen Gipuzkoan, Bizkaian, Araban eta Nafarroan; hau da, 1998ko aurreko hauteskundeen prozesua itxitakoan baino milaren bat gehiago, eta 2002ko abendukoa itxitakoan baino 300 delegatu gehiago. LABen ordezkaritzaren pisurik handiena Hego Euskal Herriko enpresa ertain eta handietan dago, horietako batzordeen ordezkaritzaren ia %17ra iristen baita. EAEri bakarrik lotzen bagatzaizkio, sindikatuak gainditu egiten du ehuneko hori, eta ordezkaritza %17,6raino igotzen zaio, CC.OO.-enetik oso hurbil, hark segitzen baitu bigarren indar sindikala izaten, ELAren atzetik, zeinek ordezkaritzaren %37,52a baitauka.