artikulu nagusira itzuli
Juan Antonio Urbeltz: «Gaur egun, dantzek gaizki eginak daudelako aspertzen gaituzte»
Donostiako Alde Zaharrean bizi da Juan Antonio Urbeltz, Argia dantza taldeko zuzendaria. Bere etxearen usainak, koloreak eta egurraren zaharrak giro berezian kokatu gaituzte. Tradizioa oinarri hartuta usain berria darion ikuskizuna egin du maisuak, Pas de Basque.
18 urte zituela sartu zen dantzen munduan eta 1988an eman zion bide euskal folklorea aztertzen egindako lanari. Hango eta hemengo dantzariak bildu eta Zortziko ikuskizuna Confolence jaialdi handira eraman zuen Urbeltzek. Arrakasta haren ondotik etorri ziren Alakiketan (1991) eta Kondharian (1997). Azken horrek nolabaiteko berritasuna ekarri zuen, dantzaren eta musikaren uztardurara ipuinen mundu magikoa ekarri baitzuen. Hurrengo erronkak, inondik ere, handia izan behar zuen. 2002ko irailean eman zuen argitara Pas de Basque, Miarritzeko Gare du Midi antzoki dotorean. 60tik gora lagunek hartu zuten parte Barroko usaina zuen ikuskizunean.
Zein da zure ustez dantzen esanahia, zertarako balio dute?
Gure herriak garai gogorrak bizi ditu. Garai honetan bizitzeko gogoa mantentzeko funtsezkoa da handik eta hemendik gure kultura eta gure nortasuna osatzen duten ezaugarriak piztea. Hori aitzakia hartuta, dantzak ere gure kulturaren oinarri direlako, nortasun sentimendu hori bultzatu nahi dugu. Norberak bere nortasunean bizitzeko gogoa izatea da funtsa, horregatik hautatu ditut euskal dantzak eta ez kanpokoak. Azken batean dantzak gure kulturaren eta nortasunaren parte dira.
Zein da dantzen arrakastarako bidea?
Dantzak arbasoentzat baliagarriak zirelako mantendu dira. Egin ditugun ikuskizun guztiek iraun egiten dute, denborari erreparatu gabe baina modari ihes egin gabe, unean uneko eskariei erantzuteko gai direlako. Azken batean, asmakerian erori gabe, antzina zen bezala jaso dugu guztia. Horregatik, ikuskizuna hemendik 50 bat urtera berdin-berdin taularatuko da. Pas de Basque iraunkorra da denboran eta unibertsala espazioan, Kursaal jauregian bezala sagardotegi batean ere egin baitaiteke. Beste gako bat bizitasuna da, eleberrigile eta artista guztien lanetan bezala. Pas de Basque bizirik dago zentzu guztietan. Horiek dira Pas de Basque erakargarri egiten duten gauzak.
Askotan aipatu duzu euskal konpainia ofizialaren beharra.
Herriko kultura eta dantzak balio izan dutelako mantendu dira, entretenigarriak izan direlako. Gaur egun, dantzek gaizki eginak daudelako aspertzen gaituzte. Horren haritik, askotan aipatu dugu konpainia ofizialaren kontua. Era asko daude hori egiteko, eta nik hau proposatuko nuke: gobernuak erakunde aitorpena eman beharko lioke sustatzen duen ikuskizunari, kalitatezkoa baldin bada. Ikuskizun horren bidea amaitzen denean, taldeak konpainia ofizial izateari utziko lioke eta hurrengo ikuskizunak kultura kontseiluaren aitorpena jaso beharko luke berriro dantza taldeari konpainia izaera aitortzeko. Lehiaketa bat izango balitz moduan. Horrela eratu beharko litzateke konpainia ofiziala. Horrek gure herriaren tradizioa aztertu eta behar bezala berreraikitzen lagunduko liguke.
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa