Argia astekaria webgunearen hasiera

Apirilean burutuko da lehen aldiz Donostian Argazki garaikidearen eta bideoaren nazioarteko azoka. Kursaalean egingo da ekitaldia, eta Ordoñez Falcon Argazki Zentroaren Fundazioak antolatu du. Horrez gain, datorren urteko maiatzean fundazioak dituen argazki fondoen erakusketa paratuko du Okendo kultur etxean. Horiek dira datorren urterako Fundazioak prestatu dituen ekimenetako bi. Izan ere, lehengo astean Tabacalerak hartuko duen Kultura Garaikidearen Nazioarteko Guneko Administrazio Batzordea bildu zen. Gune honetan egongo da Ordoñez Falcon Argazki Zentroa. Batzordeak hurrengo urterako aurrekontua adostu zuen eta Jose Joan Gonzalez de Txabarri izendatu zuen presidente.

Tolosan (Frantzia) egingo da aurten berriz ere !Mira! jaialdia. Bertan bilduko dira Espainiako zein Frantziako antzerkian, dantzan eta musikan diharduten profesionalak. 2002an egin zen lehen aldiz íMira! Toulousen, iaz Sitgesen burutu zen eta aurten Toulousera bueltatu da. Hilaren 26an hasi eta martxoaren 6a arte Pirinioaren bi aldeetara daude korronte berritzaileenak aztertu ahal izango dira. Besteak beste, Rodrigo García, Oskar Gomez Mata, Kepa Junkera, Helena Pimenta, La Zaranda edota Alex Rigolaren lanak ikusi ahal izango dira.

Hiru belaunalditako artisten lanak daude bilduta Iruñeko Moises Perez de Albeniz aretoan Nafarroako artearen egungo egoeraz eta garapenaz hausnartzeko xedearekin. 18 artistek azken 25 urtetan eginiko lanak daude ikusgai: Jose Ramon Anda, Faustino Aizkorbe, Juan Jose Aquerreta, Asuncion Goikoetxea, Pedro Salaberri edota Dora Salazarren obrak, besteak beste. Batzuk erakusketarako bereziki eginak, beste batzuk aurrez erakutsitakoak. Guztiek erakundeei egozten diete arte garaikidearekiko duten arreta eskasa. Erakusketaz gain, otsailaren amaieran mahai-inguru bat egingo dute hainbat museotako zuzendariek.

Makina bat lan esanguratsu ikusi ahal izango da aurten ere Gasteizko euskal zinemaren XX. astean. Otsailaren 24tik martxoaren 1a arte, besteak beste, Pedro Olearen Tiempo de Tormenta, Ramon Barearen El coche de pedales eta Helena Tabernaren Extranjeras lanak ikusi ahal izango dira. Egunero 12:00etan, 16:30ean, 19:00etan eta 22:00etan izango dira saioak. 12:00etakoa doakoa den arren, gainontzekoetan hiru euro ordaindu beharko dira. Sari banaketa martxoaren 4an izango da.

Asisko Urmeneta eta Marko Armspach marrazkilariek, Pantzoa Irigarai eta Maria Agnes Gorostiaga musikariek eta Esponde, Alkat eta Iribarren bertsolariek eman zioten hasiera Marrazkirri 15 erakusketari inaugurazio gisa prestatu zen afarian. Otsailaren 20tik martxoaren 20ra umorezko marrazkiek osatzen duten erakusketa horretan, arrantzari buruzko irudiak ikusi daitezke. Antolatzaileen helburua, Prestigen hondamendiak itsasoan utzi dituen arrastoak irudikatzea izan da.

XX. mendearen hasieran iritsi zen Euskal Herrira mendizaletasuna, dirudienez, alpinismo britainiarraren filosofian oinarrituta. Ordutik, mila menditara iritsi da euskal mendizaletasuna eta hori agertu nahi du lehengo astean Bilboko BBK Fundazioak martxan jarri zuen erakusketak. Bertan ikusi ahal izango dira Everestera eginiko lehen igoaldian (1980) erabili zuten ikurriña, Felix Iñurrategiren pioleta, Euskal Herrian geratzen diren kalamuzko soka bakarrenetakoa... Bibliografia, irudiak eta kartografia ugarik arakatuko dute mende oso baten ibilbidea martxoaren 6a arte.

Arte lanez gain, ekimenak antolatzeari ekin diote azkenaldian museoek, hala nola, zinema emanaldiak. Guggenheim Bilbao Museoak esaterako, otsailaren 23an hasi eta 27a bitartean, Fas zineklubaren 50. urteurrena ospatzeko Europako zinemaren hastapenetan Frantzian eta Alemanian egin ziren film mutuak eskainiko ditu. Gainera, zuzeneko musika emanaldiez lagundurik ikusi ahal izango dira film hauek. Bestalde, Bilboko Arte Eder Museoak Inoiz existitu ez zen hiria erakusketarekin batera zinema ziklo bati hasiera emango dio. Eskainiko dituen film guztiek zera dute komunean: akzioa irrealak diren lekuetan gertatzen dela. Besteak beste, Ozeko magoa edo Herrialde Miresgarriko Alizia bezalako filmak ikusi ahal izango dira.

Hainbat tokitan idazleek bizi dituzten jazarpen egoerak aldarrikatu eta salatzeko sortu zen 1993an Autodafe Idazleen Nazioarteko Parlamentuko aldizkaria. Orduan, Aljerian hainbat idazlek jasandako atentatuen erantzuna izan zen. Urte batzuk igaro dira, baina lehengo astean aurkeztu zen lehen aldiz aldizkari horren euskarazko itzulpena. Garikoitz Knörr-ek egin du lana eta lehengo astean Gasteizen egin zen Nazioarteko Idazleen Parlamentuko kideen jardunaldietan ezagutarazi zuten. Udarako bigarren zenbakia kaleratuko omen da.

Iñigo Royo argazkilariak honakoa zioen «Galtzaundi»n: «Nire ustez ARCO atal askotan nahiko penagarria den harrokeriaren azoka handi bat besterik ez da».

Pello Irazu artistaren hitzak dira hauek «TU Lankide» aldizkarian eginiko elkarrizketan jasotakoak: «Ekimen pribatua botatzen dut faltan, azpiegitura profesionala, esan nahi dut galerien ingurukoa, izan ere, beste arlo batzuetan, horiek bitartekaritza lanak egin ditzakete artistaren eta gizartearen artean; horrek erakuts dezake egiazki gizarte honek arte garaikidean duen interesa».

Gorka Urbizu Berri Txarrak taldeko abeslariak «Gara»n eginiko adierazpenak dira hauek bizitako esperientziaren inguruan: «Bakarrik sentitu izan gara eraso horiek egin dizkigutenean, nahiz eta bakarrak ez garen eta estatu espainoleko beste taldeekin harremanak mantentzen ditugun. Dei dezente jaso ditugu, eta eskertzekoak dira. Baina espero genituen adierazpenak edota interesa izan zezaketenen deiak, batez ere, musikarekin edo adierazpen artistikoekin zerikusia dutenenak, isildu egin dira eta hori ere kontuan hartu beharrekoa da».

Luis de Pablok Jacinto e Inocencio Guerrero Fundazioak ematen duen Musikaren Saria irabazi du. Sari hori musika alorreko Cervantes saritzat hartua dago. Guztira, 72.000 euro irabazi ditu musikariak. Horrez gain, de Pablo bi lan konposatzen ari da, horietako bat pianorako burututako partitura handi bat da. Bestea Turineko Orkestrarako enkarguzko lan bat da eta 2005ean estreinatuko da.

Aitzpea Leizaola Egaña izango da hemendik aurrera UEUko zuzendaria, Xabier Isasiren lekua hartuz. Leizaola donostiarra da eta antropologian eta hizkuntzalaritzan lizentziatua dago. 1995etik UEUko Antropologia sailburua da. Aldi berean, Aranzadiko Etnografia saileko kide eta Ankulegi aldizkariko erredakzio taldeko kidea da.

Xabier Mendigurenek Arbelaren gainean izeneko liburua aurkeztu berri du Elkar argitaletxearen eskutik.

Oreka TX taldeak Laponiara bidaia egingo du bere hurrengo lana, Nomadak, prestatzen jarraitzeko. Bertan, Terje Isungset musikariarekin lan egingo dute, batez ere. Azken honek izotzarekin egiten du lan, besteak beste.

Tanttakak Paradero desconocido estreinatuko du apirilaren bukaeran Donostian. Fernando Bernuesek zuzendu, eta Kike Diaz de Radak eta Isidoro Fernandezek taularatuko dute. Bizi guztiko laguntasun bat diferentzia ideologikoengatik nola hausten den agertzen du antzezlanak. Gainera, taula gainean musika eskainiko dute Iñaki Salvadorrek (pianoan) eta Peio Ramirezek (biolontxeloan). Bestalde, Tanttaka teatroaren eta Kukai dantza konpainiaren 1937, gogoaren bidezidorretatik ikuskizuna Max Sarien Errebelazio Sarirako izendatu dute.