Argia astekaria webgunearen hasiera

Castillo Suarezek poesia liburua plazaratuko du maiatzean Elkar argitaletxearen eskutik. Spam poemak izango du izenburutzat.

Asier Zabaleta koreografo gipuzkoarrak aurkeztu berri du Bilboko La Fundicion aretoan Ego-tik bere azken koreografia. Lan horretan dantzaren eta arte eszenikoen munduko begirada kritikoa agertzen du Zabaletak. Dantzariak Suitzako Alias konpainian egiten du lan.

Iruri eta Zalgize herriak arduratuko dira aurten Zuberoako maskarada taularatzeaz. Otsailaren 15ean egingo da lehen emanaldia Zalgizen eta ekainaren 6an azkena Mendikotan.

Bernardo Atxagak, Fernando Aramburuk, Belén Gopeguik, Javier Maríasek... idatzi dute, gaztelaniaz lehen aldiz argitaratu den Granta aldizkari literarioan. Ingelesez idatzitako aldizkari literariorik garrantzitsuenetakoa da Granta. Gaztelaniaz Emecé argitaletxeak kaleratzen du. Bertan, ingelesezko testuen itzulpenez gain (Arthur Miller eta Susan Sontagenak, esaterako), gaztelaniaz idatzitako kronikak, ipuinak eta testuak daude. Lehenengo alean, egileek isiltasunari buruz idatzi dute.

Fjord taldeak otsailean grabatuko du estraineko diskoa. Gaztelupeko Hotsak-ek eskainitako informazioaren arabera, Sutagar, Ekon eta Etsaiak bezalako talde beteranoetan aritutako musikariek hartuko dute parte bertan eta rock gaurkotua jorratuko du talde berriak.

Bitoriano Gandiaga hil zela hiru urte beteko dira aurten. Hori dela eta otsailaren 21ean Sondikan ekitaldi berezia egingo dute. Besteak beste, Gontzal Mendibilek musikatuko ditu Gandiagaren zenbait poema, eta Pello Zabala arituko da narratzaile lanetan.