Argia astekaria webgunearen hasiera

Euskal Herriko lurralde guztietan dago enplegua deslokalizatzeko edo enpresak edo haien ekoizpenaren parte bat lekuz aldatzeko arriskua. Hain da hala, non dagoeneko Araban, Bizkaian eta Gipuzkoan bai baitira adibideak. Nolanahi ere, gerta daiteke zigorrik handiena Nafarroak eta Iparraldeak jasotzea, zeren, batean nahiz bestean, multinazional ugari baitago. Iparraldean, esate baterako, ekoizpen egitura multinazionaletan oinarritua dago neurri handi batean: 19 enpresa garrantzitsuenetan, 13 dira multinazionalak, industriako enpleguaren %32 hartzen dute eta sektore elektrikoan eta elektronikoan aritzen dira gehienbat. Bestalde, multinazionalen eraginpeko 240 enpresa lagungarri daude, eta 3.400 lanpostu biltzen dituzte guztira.

Euskal Herriko lurraldeetan, dena dela, multinazionalek Nafarroan dute pisu handiena. Horrez gainera, Nafarroa da, halaber, dibertsifikazio industrial gutxien duena: automobilaren sektorearen mende dago industriaren zati handiena, eta sektorea bera multinazionalen eskuetan: industriako enpleguaren %33 hartzen du (12.000 lanpostu gutxi gorabehera). Nafarroako sektore horretarako lanean aritzen diren enpresa lagungarriak, berriz, 240 bat dira, eta 10.000 lagun enplegatzen dituzte. Bestela esanda, Nafarroan 22.000 pertsona baino gehiago dira automobilaren sektoreko multinazionalen mende bizi direnak.