Argia astekaria webgunearen hasiera

Eskolez gain, Esperanza taldeak haurtzaindegiak ere jarri ditu Petaren. Lehendabizi bat fundatu zuten, El Colibrí izenekoa, eta handik pixka batera beste bat ere eraiki zuten 90 haurrentzat: Los Grillos. Izena Zarauzko Kirkilla sendiaren omenez jarri zioten. Izan ere, Egiguren Maria Luisa Ameztoiren, Karlos Argiñanoren emaztearen, lehengusua da, eta haiek dira haurtzaindegia aurrera ateratzen gehien lagundu diotenak. Hasieran Eusko Jaurlaritzaren dirulaguntza ere jaso zuten, baina kirkillatarrak dira urtero-urtero bertara joan eta laguntzen jarraitzen dutenak. Bitxia da hain urruneko haurtzaindegi baten sarreran Karlos Argiñanoren eta bere emaztearen argazkiarekin topo egitea. Baina horixe da Los Grillos; Caracasko auzorik txiroenetarikoan haurren babesleku bihurtu den etxea.

Gaur egun, 200 haur baino gehiago dabiltza Los Grillos-en. Haurtzaindegiak hiru solairu ditu, baina azken bi urteotan haurtzaindegiaren gainean bi solairu eraiki dituzte. Bertan 15-16 urteko hirurogei bat neraberi irakurtzen, idazten, zenbatzen eta abar irakasten diete gero eskolako hirugarren edo laugarren mailan sartzeko aukera izan dezaten, bestela haur horiek ez baitituzte inongo ikastetxetan onartzen.

Horrez gain, ordenagailu gela bat ere jarri dute. Zazpi ordenagailu dituzte eta telefono linearen zain daude Internet jarri eta komunikazio zentro bat izan dadin. Hori nahikoa ez eta Argiñano eta bere emaztearen laguntzari esker, haurtzaindegiaren ondoan okindegi bat ere zabaldu zuten duela pare bat urte.