Euskal Herriak bizi duen egoera politikoaz diagnosia egiteko asmoz, Nazio eztabaidaguneak Ekarpen Foroa egingo du azaroaren 29an Leioako campusean. EAko Martin Aranburu, Maite Aristegi eta Antton Izagirre Tolosako alkate ohia izango dira foroaren bozeramaileak. Foroan parte hartu nahi duenak 943377112 telefonora dei dezake edo helbide hautera idatzi: Eztabidaguneahotmail.com edo Eztabaidaguneaeuskalerria.org.
Nola jarraitu aurrera Ibarretxe planarekin?
Hiru hilabete ditu Espainiako Auzitegi Konstituzionalak Gernikako Estatutuaren erreformaren abiada atzera botatzeko, baina inork gutxik jartzen du zalantzan egungo prozedurak bere horretan jai duela. Beste zerbait asmatu beharko du, beraz, Ibarretxe lehendakariaren Gobernuak. «Zer» baino, beraz, azken asteotan «nola» bilakatzen ari da Madril eta Gasteizen arteko tira-biraren ardatz. Legezko trikimailu ugari egon daiteke aurrera egiteko eta, seguruenik, bata eta bestea nola aktibatu eta desaktibatzen den ikusiko da datozen hilabeteetan, baina lehenago edo geroago zezenari adarretatik heltzeko unea etorriko da eta iragarritako trenen talka zein parametrotan gauzatu nahi duen erabaki beharko du Espainiako Gobernuak, Ibarretxek bere edukiak egungo moldeetan mantentzen baditu behintzat.
Imaz eta Egibarren arteko lehia gordina EAJn.
Azken boladan EBBko lehendakaritza berriaren hautaketa prozesuari buruz entzuten diren guztiekin, Xabier Arzalluzek dagoeneko bidea libre utzi diola antzeman liteke, buruzagi historikoak igandean Sabin Etxean egindako iragarpenarekin. Alde horretatik pentsatu bezala doa dena, baina hasieran Imaz eta Egibarren arteko lehiak lehenengoaren alde erraz egingo zuela zabaldu bazen ere, gaurkoz Egibar irabazle doala irudikatu du Izaronews Interneteko webgunean. Bi sektoreen arteko lehia latza irudikatzen ari dira
Udalbiltza bakarraren irudia eta erronkak
EAJk eta EAk osatzen duten Udalbiltzak Batzar Nagusia egin berri du eta Udalbiltza bakarraren irudia hedatu du euskal gizartean, Espainiako Estatuak ezker abertzalearen Udalbiltza espetxeratu eta legez kanpo jarri, eta haren oinarria udal agintetik baztertu ondoren. Basauriko batzarrean ate joka aritu ziren ezker abertzaleko hautetsi asko, beraiek onartzen ez dituen Udalbiltzaren jarrera salatuz. Euskal kulturaren eremuan biziki estimatuak diren diru banaketetatik haratago, epe motzera, erakunde hau osatzeko borondatea duten udal ordezkaritza guztiak integratzeko baldintzen alde egitea izango da Azpeitiko alkate Julian Eizmendiren erronka handiena, beste agintaldi batean erren aritu nahi ez badu bederen. Ez dirudi datozen hilabeteetan horretarako aukerarik faltako denik.
61 atxilotu demoen mus txapelketan
Mus txapelketa berezia egin zuten demoek larunbatean Lapurdiko burdinbideen gainean, SNCFk euskara erabil dezan egiten ari diren kanpainaren baitan. 130 euskaltzalek Lapurdiko burbinbideak moztu zituzten mus txapelketarekin eta CRSek 61 lagun atxilotu zituzten. Gauerako aske utzi zituzten, baina baliteke isunak eta espetxea etortzea orain. Hendaiako polizia etxean izan zirenei, urtarrilaren 8an epaituko dituztela esan zieten.
«A bildua» hobetsi du Euskaltzaindiak
ikurrari «a bildua» deitzea hobetsi du Euskararen Akademiak, berriki Bilbon egindako bileran. Gaurko bizimoduan garrantzi handia duen sinboloa da eta Hiztegi Batuan sarrera du dagoeneko. Proposamen ugari egin izan dira aurretik ikur hau izendatzeko: a batua, barraskiloa. txiribita... ARGIAn ere jorratu genuen gaia (1776 zenbakia). Hedapen zabaleko espainierazko arroba guztiz gaitzetsi ez duen arren, «a bildua» izendapena hobestea erabaki du Euskaltzaindiak, eredu jatorragoa eskaini nahian.
EHEren Nazio Batzarra
Euskal herrian Euskaraz-ek urteko Nazio Batzarra egin berri du. Euskararen egoerari buruzko diagnosia egin zuten batetik, eta bestetik, aurrera begirako erronkak finkatu. Asmoa hizkuntz eskubideen aldeko mugimendua eta ofizialtasuna lurralde osoan aldarrikatzea da. Bestalde, oraingo esparru politiko-juridikoa gainditu beharra azpimarratu zuten. Datorren urte hasierarako ekitaldi erraldoi bat iragarri dute eta baita hizkuntz eskubideen aldeko egun nazionala udaberrirako ere.
Kontseilua akordio sozio-politikoaren bila
Euskararen Gizarte Erakundeen Kontseiluak datozen asteotan akordio sozio-politikoa lortzeko abian jarri duen plana azaldu berri du. Akordio hau bi alorretan oinarritzen da. Batetik, bizi dugun «egoera larri» honetan euskara normalizatzeko sustapen lana egin behar dela adierazi dute. Bestetik, euskalgintzak erasoen aurrean babesa lor dezan neurri politiko, ekonomiko eta juridikoak hartu beharko dira.
Hirugarren Hitza kalean
Lea-artibaiko hitza, euskarazko eguneroko agerkaria, kalean da jada Bizkaiko lehen Hitza da Lea-Artibaiko 11 herrietan eta Mutrikun banatuko dena. Mutriku eskualdeko herria ez den arren, harreman handia du Lea-Artibairekin eta horrexegatik banatuko dute han. Hitza argitaratzen duen enpresa S. L. bat da, eskualdeko euskara taldeek, gizarte eragileek eta Bertako Hedabideak enpresak osatua. Hamar pertsona ari dira bertan lanean eta Gabonetarako 5.000 harpidedun lortzea jarri dute heleburu gisa.
Abertzaleen arteko koalizio asmoa Nafarroan.
Aspaldikoa da Espainiako hauteskunde orokorretarako Nafarroan koalizio abertzale bat osatzearen ahalegina eta behin baino gehiagotan ideia gauzatzetik gertu egon izan da. 2004ko hauteskunde orokorrei begira, ideia hori berriz ari da martxan, ARGIAk urrian argitaratutako elkarrizketan Patxi Zabaletak adierazi zuen bezala. ETA ez balego, Nafarroan Galiziako BNGren antzeko bat egin beharko litzatekeela ere entzun ohi zaio bati baino gehiagori, besteak beste Goio Monreal unibertsitateko irakasleari. ARGIAk jakin izan duenez, zenbait indar abertzaleren arteko negoziazioak bide onetik doaz koalizio abertzale hori osatze aldera, nahiz eta oraindik badiren zailtasunak.
Lege Oharra
RSS sindikazioa