Espainol enpresaburuen sindikatuko nagusiak, xefak, Aznarri emandako aholkuan hordagoa jo du. Egunkariak, irratia, aldizkaria itxi eta Batasuna alderdia bortxaz eta modu nazkagarrian ilegalizatu ondorengo kalma txitxa ikusita, autonomia bera ere era berean suntsitu dezakeela esan dio, Moncloako maizterrak orain artean hemen lortutako guztia hankaz gora emateko animuak eta bibak beharko balitu bezala. Ez dut nik bere curriculumaren berri. Baina bere adina kontuan hartuz gero, lantokiak kuartelak eta langileak soldaduak balira bezala tratatzen zituen haietakoa dela ondoriozta dezaket. Langileak kanporatzea errekonbertsioa, eta grebak ekonomia sozialaren aurkako erasotzat jotzen zituen haietakoa. Bere bulegoa kobazulo, izena ere halakoa baitu honek zuloa hitzarekin uztartzekoa alegia, lantokiko gainean izango zuen ezarria, kuarteletako arkitekturari jarraiki tailerrak larre bazkak eta langileak ardiak bailiran zelatatzeko. Bat bakarra eta bera. Handia. Eta ahal balitz, berea eta bere kideena. Hola irudikatzen du bere Espainia. Eta ardiak ez garenekin zer egin dute arazo. Gaur bertan beste hogeita hamabost bat atxilotuta. Eta Espainia aldean txaloak. Eta etxean?