Errepikapenaren errepikapenaz «pelmak» iruditu arren, Ibarretxe Planak, nahiz eta behin irakurrita kritika dezente merezi, Espainiako panorama politikoari izugarrizko zartada eragin dio. Hainbestekoa izan da zartada, ezen badirudi ergel edo ezjakinak soilik alderdi abertzale ezberdinak gera litezkeela, eta zehatzago ezker abertzaleak -gogoan ditudan denboran behintzat- jasan duen enbata politiko handienari bete-betean aurre egingo dion alternatiba politiko bateratu bat planteatzeko saiakera garrantzitsu bat egin gabe.

EAJren baitan beti izan dute politikoki aurrera egiteko eta Gernikako Autonomia Estatututik at aurrera pausuak emateko izua. Ezker abertzalean, berriz, gauza gehiegi egin dira «bihotza»rekin, baina euren proiektuak errealitatearekin eta gaur egungo ingurune politikoarekin bat egiteko arintasun politikoa falta izan du.

Herri honetan, «frente» hitza erabiltzeko beldurra alde batetik eta lotsa bestetik ere izan da, halaxe inposatu baitigu Madrildik «ariete mediatikoak». Eurek, artean, sekula Euskal Herrian imagina ahal izan dugun «frente» nabarmen eta latzena eratu dute.

Eta orain, berriz ere, batzuk «frente»ei buruz hasi dira berba egiten. Berdin zait «frente», «bizkar» edo «costado» den, baina orain da Euskal Herrian ados dauden indar politikoak, guztiak, Euskadin (Vascongadetan alegia) gehiengo garrantzitsu bat eratuz, botere koalizio bat eratzeko garaia. Orain da beraz indar politiko horiek botere politikoa oraindik posible ez den lekuetan alternatibak garatzeko garaia: jada lortutakoa berretsi eta haratago eramateko alde batetik; eta bestetik, Euskadi ariete nagusi eta era berean probaketarako gune izango litzatekeen alternatiba politiko independentista baten ezaugarri nagusiak finkatuko lituzkeen Euskal Herri osorako alternatiba politiko globalak eratzeko.

Honek, denongan indarra eta ausardia eskatzen du. Ausardia honek ez du «eta nik gehiago»aren jokoan sartzea esaterik nahi, baizik eta kidearenganako mesfidantza eta ekintzaren etekin politikoak nork irabaziko dituen kalkulatzeari utzi eta ibilbidean elkarrekin ekiteko bideak eta metodoak bilatu eta aurkitzea baizik.

Ausardia eta inteligentzia azken finean, ilunpean dagoen gela batean egon eta irtenbidea bilatzen kolpe anitz jasotzean datza. Lerdoa beti gelaren erdigunean geratzen dena baita.