Argia astekaria webgunearen hasiera

Orain artean munduko 100 herrialdetako 5.000tik gora marrazkilarik hartu dute parte Bratislavako Ilustrazio Biurtekoan. Aurtengoa 19. ekitaldia da eta bertan dira ikusgai Iñaki Martiarena «Mattin»en eta Elena Odriozolaren marrazkiak. Biurtekoa haur eta gazte literaturaren arloan ilustraziogintzan munduan dagoen erakusketarik garranzitsuena da. Lehiaketaz gain, erakusketak, hitzaldiak, lantegiak eta topaketak egiten dira Biurtekoan. Guztira 311 marrazkilarik hartu dute parte eta orotara, 2.398 marrazki dira ikusgai. «Mattin»ek Mitxel Muruak idatzitako «Maripuzker» (Elkar) liburuko 18 marrazki ditu bertan. Eta Odriozolak «Marlene eta taxizapata» (Ediciones SM) eta «Eta txorimaloa mintzatu zen» (Aizkorri) liburuetako irudiak.

Garai bateko trikitia eta honek dituen erronkak aztertuko dira Euskal Herriko Trikitixa Elkarteak antolatu dituen Trikitixaren I. Jardunaldietan. Donostiako Koldo Mitxelena Kulturunean egingo dira irailaren 30ean hasi eta urriaren 3a arte. Bi hitzaldi eta bi mahai-inguru burutuko dira: Amagoia Ibanek eta Mikel Markezek emango dituzte hitzaldiak. Lehena trikitixaren historiaz eta argitarapenez mintzatuko da. Bigarrenak binilotik konpaktora egindako jauzia aztertuko du. Mahai-inguruei dagokienez, Jose Mari Iriondok «Trikitixaz, zenbait gogoeta» izenekoa gidatuko du eta Jabi Nabarrok «Gaur egungo erronkak, etorkizunari begira» izenekoa zuzenduko du.

Irakurketarako giden bilduma izan nahi du Euskal Idazleen Elkartea laster plazaratzen hasiko den «Liburuen xarma» izenekoa. Bilduma horren lehenengo bi aleak urrian kaleratuko ditu EIEk. Lehena aurkezpen gisa prestatu dute; bigarrenak, aldiz, poesia lantzeko pistak ematen ditu. Izan ere, «Liburuen xarma»k irakasleei literatura erakutsi eta lantzeko argibideak ematea du xede.

Amerikako Estatu Batuetako latinoamerikarrei eskaini die Miarritzeko 12. Citak, Hego Ameriketako zinema eta kultura jaialdiak, aurtengo edizioa. «Made in USA» atzerabegirakoan Hego Amerikak AEBetan ekoitzi den zineman duen eragina ikusi ahal izango da 13 filmetan. Hiru mintzaldi eta mahai-inguru bat ere antolatu dituzte non, besteak beste, etorkin izatetik herritar bilakatzera egiten den prozesua eta gaztelera eta ingelesaren arteko nahasketa aztertuko diren. Urteroko lehiaketari dagokionez, aurten dokumentalari eman zaio garrantzia. Izan ere 12tik 16ra igo dute eskainiko diren lanen kopurua sail horretan. Cita hilaren 29an hasi eta urriaren 5ean amaituko da.

Oraingoan Julio Medemi eta bere «Euskal pilota, larrua harriaren kontra» dokumentalari egokitu zaio. Zuzendari donostiarrak euskal gatazka agertu nahi izan du dokumentalean 70 pertsona elkarrizketatuz. Horietako bik, Gotzone Mora Askatasunaren Aldeko Irakasleak plataformako bozeramaileak eta Ermuko Foruko sortzaile den Iñaki Ezkerrak dokumentaletik euren adierazpenak kentzeko eskatu zuten. Hauen ustez, «indarkeria terroristari koartada ideologikoa eskaintzen» baitzion. Ondoren, Maria San Gilek Odon Elorzari «filma eskaintzea egokia ote den» aztertzeko eskatu zion. Albiste hau idazterakoan estreinatu gabe zegoen filma. Hala ere, Zinemaldiko zuzendari Mikel Olaziregik ez zutela egitarautik kenduko esan zuen. Medemek bazekien dokumentala polemikoa izango zela. Baina muga guztiak gainditu ditu: Zinemaldia hasterako kultura orrialdeak bete ditu polemika politikoak. Eta ondorioz, lehen egunerako, sarrerak guztiz agortuta zeuden.

Horixe da urriaren 8tik 11ra Gasteizko Villa Suso Jauregian Xabide Kultur kudeaketa eta komunikazio taldeak antolatu dituen jardunaldien izenburua. Kultur kudeaketan komunikazioak duen garrantzia eta kultur kudeaketak komunikazio faktore bezala izan dezakeen funtzioa aztertuko dira bertan.

Etxea, bizitzeko leku gisa erabili ohi dugu. Baina etxea hori baino gehiago da. Etxean izaten ditugu gure lehen harremanak; etxea adierazpen estetikoa da; eta baita lantokia eta errito eta transmisio esparrua ere. Horregatik Iruñeko Ortzadar Kultur Elkarteak aurtengo Folklore Jardunaldiak etxea eta etxekoei eskainiko dizkie. Azaroaren 12an hasi eta 14a bitartean «Jatorrizko eraikuntza: etxea eta etxekoak» izenpean burutuko dira Iruñean. Bertan aztertuko da etxea adierazpen soziokultural moduan. Etxekoen arteko harremanak, etxeek izango dituzten itxura aldaketak, kultura, gizartea eta etxearen arteko erlazioak, etxeen zaharberritzea eta ondaretzea... dira, besteak beste landuko diren alorrak.