Argia astekaria webgunearen hasiera

Uda-partean jende asko ibiltzen da aztoratuta bere itxurarekin. Jakina, hondartzara joateko garaia denez, geure gorputza guztien agerian jarri beharra izaten dugu, eta horrek soberan ditugun kiloak galtzeko grina edo afana pizten du gure buruan. Eta noski, neguan eta udaberrian metatutako gantzak derrepentean bota nahian, eguneroko kaloria kopurua neurriz kanpo murriztea izan ohi da askori bururatzen zaien erremedioa.
Beno, ba jakin ezazue guztiek: Nafarroako Unibertsitatean Endokrinologia eta Metabolismoko espezialista den Javier Salvador adituak esan duenez, "udan hain ohizkoak diren 1.000 kaloriaz azpiko dietak trastorno garrantzitsuak ekar ditzakete kontrol mediko egokirik gabe egiten dituzten pertsonen metabolismoan". Adituen ustez, trastorno horiek areagotu egiten dira tenperaturak gora egin ahala gorputzean eragiten den deshidratazio-egoera dela medio. Bestalde, era horretako jan-neurriek gorputzaren masa gutxitzea dakarte (masa horren alderdi magroa, giharrea alegia, da gehien galtzen dena), eta horrek metabolismo energetikoa ere murrizten duenez, ondorioz pisua berriro irabaztea askoz ere errazago gertatzen da.
Kasurik gehienetan, kiloen beherakada likidoen galerari zor zaio, eta gantzik gabeko masa-galerari. Horien ondorioz, itxura batean, bolumena eta pisua galdu egiten da. Baina galera horiek ez dute luzaroan irauten, eta hori baino okerragoa dena, galerak ez dira sortzen benetan obesitatea eragin edo sortzen duen atalean, gantz-ehunean hain zuzen. Beraz, argi ibili, eta dieta hipokaloriko bat egin nahi izanez gero, betiere orekatua izan dadila, eta medikuak agindua.