Argia astekaria webgunearen hasiera

Pixkanaka aldatzen joan dira. Baina asko dago oraindik egiteke. Nahiz eta museo ugarik zine emanaldiak, musika ekitaldiak eta publikoaren parte hartzea sustatzeko ekintzak bultzatzeari ekin dioten, arte lanak kolekzionatzeko edo ikertzeko guneak dira sarri oraindik museoak. Maiatzaren 15ean eginiko Museoen Nazioarteko Egunaren ospakizuna dela eta, urtero legez, ekitaldiak antolatu dira. Jokoak, bideo emanaldiak edo doaneko sarrerak ugari dira egun horretan. Artea eta museoak gizarteari gerturatzeko modua izan daiteke. Izan ere, arte aretoetako ardurardun gehienek uste dute egun jende kopuruagatik baino, jende horren asetze mailagatik neurtzen dela museo baten arrakasta.

Gasteizko Artxibo publikoek gordetzen dituzten altxor preziatuenak daude ikusgai Montehermoso Kultur Zentroan hirian egiten den Liburu Zaharraren bigarren erakustaldian. Artxiboak eta hiriko Libris, Liburu zaharren liburu saltzaileen Elkarteak antolatutako ekitaldiak bi zati ditu. Lehenengoan, Libris elkarteak utzitako altxorretako batzuk daude ikusgai, eta salgai. Bigarrenean, Artxiboak gordetzen dituen 900 liburuen artetik hautatuko batzuk paratu dituzte. Erakusketan, bi inkunable ikus daitezke, 1485 eta 1500ekoak. Gainera, Gasteizen, 1722an inprimatu zen lehen liburua dago edo artxiboak gordetzen duen euskarazko lehen alea, 1845ean Sebastian Mogelek burutua, ikusgai daude. Erakusketa maiatzaren 24an martxan jarriko den Liburu Zaharraren Feriarekin batera egingo da. Biak ekainaren 8a arte luzatuko dira.

Izena aldatu diote urtero Donostian egin ohi den Donostiako Publizitate Jaialdiari. Maiatzaren 29an hasi eta 31 arte luzatuko den aurtengo ekitaldiak El Sol. 18. Iberoamerikako Publizitate Jaialdia izena izango du. Orain artean Espainiako publizitate agentziek hartzen zuten parte lehian. Oraingoan, Portugal, Amerikako Estatu Batuak eta Ibero Amerikara zabalduko da. Guztira, 1.941 lan aurkeztuko dira, %32 Espainiatik kanpokoak.

Zortzi herri hartuko ditu aurten Nafarroako Escena 2003 dantza garaikideko jaialdiak. Guztira, sei izango dira aurkeztuko diren ikuskizunak. Carmen Rocheren Baletak, Tempomobilek, Espainiako Balet Berriak, Arrancaladanzak, Thomas Noon Dancek eta Akelarre Danzak hartuko dute parte ekitaldian. Ikuskizunetako batzuk dagoeneko eskaini dira, baina oraindik, besteak beste, Beran hilaren 23an eta Antsoainen 30ean Tempomobileren azken lana ikusi ahal izango da. Eta hilaren 24an Akelarre Danzak «Tangram» ikuskizuna tularatuko du Zizur Nagusian.

Hil ondoren ere zer esana ematen du Jorge Oteizak. Maiatzaren 8an inauguratu zen Jorge Oteiza Fundazio Museoa. Baina Fundazioko patronatuko Oteizaren inguruko kideak ez ziren bertan. Inauguratu arren, Museoak proiekturik ez duela nabarmendu du hainbatek. Sorpresak ere izan ziren: Oteizak bere iloba Pilar Oteiza izendatu zuela bere ondarearen oinordeko jakin zen; eta Oteitzaren Lagunen Elkartea aurkeztu zen. Gainera, aste honetan «Ahora tengo que irme» (Txalaparta) eta «Historia de una inquietud» (Txertoa) liburuak plazaratu dira. Lehenak argitaragabeko Oteizaren hainbat lan biltzen du. Bestean, Juan Antonio Garcíak artistaren inguruan izandako tira-birak lantzen ditu.

Canneseko Nazioarteko Zinema Jaialdiaren baitan burutu berri da. Europako Batasuneko kideen Kultura ministroak bildu ziren bertan. Izan ere, Europako zinema eta ikus-entzunezkoen politika baterako oinarriak jarri nahi dituzte. Europako Batasunean 1997tik 2001era zinemara joateko ohitura %20 igo dela da datu positiboa. Baina, egun, ez dago ikus-entzunezko industriarik Europan. Herrialde bakoitzak du berea, hobea edo okerragoa. Eta guztiek esportatzeko gaitasun gutxi dute. Jakin berri dugu, hala ere, Bizkaiko Aldundiaren ekimenez, Tokion (Japonia) euskal zinemagileek zuzendutako zortzi film eta zortzi laburmetrai eskainiko direla ekainaren 4an eta 5ean. Eta datozen urteetan Euskal Zinemaren Astea munduko beste hainbat lekutan eskaintzea da asmoa.

Barañainen, 18 txotxongilo taldek osatzen dute hilaren 31 arte burutzen ari den Txotxongilo Jaialdiaren egitaraua. Deban, antzerki amateurra da hil honen 23tik ekainaren 1a arte egingo den Antzerki Asteko protagonista. Dar-dar Produkzioak, Goazek, Takolo, Pirritx eta Porrotxek eta hainbat antzerki eskolek hartzen dute parte. Eta umorea eta kalea izango dira nagusi Leioan, maiatzaren 29tik ekaina arte. 45 konpainiek, bertakoek eta kanpokoek, parte hartuko dute Umorezko Kale antzerki azokan.

Joxean Agirreren hitzak dira hauek «Txaparro» aldizkarian jasoak: «Izugarri gustatzen zaizkit euren neurak sorkuntzarako erabiltzen dituzten idazleak».

Ibon Aranberri artistak honakoa zioen «Gara»n: «Azken urteotan herriz herri egiten ari diren eskultura horien kontra nago erabat, eta (Oteiza) Fundazioak daraman bidearen kontra, are gehiago. 53an produkzio materiala alde batera utzi zuenean, erabaki guztiz artistikoa izan zen; eta, antropologia edo poesia idazten duenean, bera eskulture sentitzen da (...). Baina non geratu da Oteizaren lan pedagogikoa? Donostian, (...) Oteizaren eskultura bat jarri dute Paseo Berrian Txillidarekin lehiatzeko eta beti Txillidak irabazten du, Txillidaren obrak hor egoteko sortu zirelako eta Oteizarenak ez».

Kepa Junkerak «Aizu»n: «Txalaparta tresna egokia da Euskal Herriaren izena esportatzeko (...)».

Cristina Iglesias artista donostiarrak zera adierazi zuen«La Clave» aldizkarian: «Galeria eta artista guztiek saldu nahi dute, zerbaitetaz bizi behar dugulako».

Iñaki Graceneak eta Ainara Garcíak irabazi dute Kutxak eta Gipuzkoako Aldundiak antolatzen duten Artista Berrien Lehiaketa. 7.000 eurotako saria jasoko du bakoitzak.

Ernestina de Champourcin poeta gasteiztarraren «Del exilio a Dios» biografia plazaratu du Beatriz Cornella historialariak. Ernestina Espainiako 27ko Belaunaldiko emakume bakarretarikoa zen.

Pello Otxotekoren «Arnasa galduaren ondarea» kaleratu berri du Elkarrek.

Bilboko Orkestra Sinfonikoaren 80 urteko ibilbidea aztertu dute zenbait ikertzailek «Ochenta años de música urbana» liburuan.

Josemari Velez de Mendizabalek Jose Mari Azkarraga «Lurgorri» kazetari eta politikariaren biografia plazaratu du.