Argia astekaria webgunearen hasiera

Joan den astean inauguratu zen berari buruzko ikus-entzunezko bat. Ikus-entzunezkoak ordu erdiz Iparragirreren bizipenak azaltzen ditu abestiak tartekatuz eta honen ondoren banatzen den esku orrian, kantautore urretxuarrak berak Erdi Aroko Urretxun barneratuko gaitu, gida lana eginez.



Joxe Mari Iparragirre koblakaria gaur egun bere izena daraman kaleko 8. zenbakian jaio zen, Alzola etxean, hain zuzen ere. Oso gaztea zela Madrilera eraman bazuten ere, handik ihes egin zuen sorlekura itzultzeko eta karlisten alde boluntario gisa sartzeko asmoz. Bergarako Besarkadaren ondoren, Londresera alde egin behar izan zuen, baina handik urte batzuetara Euskal Herrira eta baita Madrilera ere itzuli zen. Hiri honetan abestu zuen lehenengo aldiz Gernikako Arbola obra ospetsua, 1853. urtean, hain zuzen ere. Kanta euskal jendearen artean ospetsua bihurtu zen heinean, agintariek abesti subertsibotzat jo zuten eta horregatik abeslaria Hego Ameriketara kanporatu zuten. Argentinan eta Uruguaien ere kantuak konposatzen jarraitu zuen, 1878. urtean itzulerako bidea hartzea erabaki zuen arte. Ordurako Iparragirre hainbeste sufritu zuen herri honentzako sinbolo garrantzitsua bilakatu zen eta koblakariari merezi zuen begirunea eman zioten Bizkaia, Gipuzkoa, Araba eta Nafarroako Foru Aldundiek, 60 urterekin pentsioa eta diru laguntza emanez.



Iparragirreren bidez islatzen da mendeetan zehar herri honek izan duen espiritu askea, gaur egun, iragana eta oraina ulertzeko lagungarri suertatzen zaigularik.

Hilerrian dagoen "Askatasunaren egarria" izeneko mausoleoa Iparragirreren heriotzaren mendeurrenean eraiki zen, 1981. urtean.