Argia astekaria webgunearen hasiera

Eguneroko otorduetan milaka urtetako jakituria biltzen da. Izena arabeen kourkoum-etik datorkion kurkuma landaretik -Curcuma domestica edo C. longa- sortzen den izen bereko espeziaren erabilerari buruzko lehen aztarnek lau bat mila urte omen dituzte eta duela 2.600 urteko asiriarren idatzietan jasoa omen da, beti ere zibilizazio guztien iturri den Asia zabalean. Pertsian eguzki gorria gurtzeko erabiltzen dute eta Indian lotsaren gorria estaltzeko azala kurkumaz urreztatzen dute. Arroz soroak uzta ona eman dezan landare hau landatzen dute erdi-erdian. Sukaldaritzan erabiltzen da gehien bat: azafrai garestiegiaren ordezko gisa Europan eta kurriaren gisako saltsak osatzeko mundu osoan. Aho sabaiari mikatza eta mina den puntu bat eransten dio eta laranja eta jengibre kutsuaz apetitua pizteaz gain, osasunerako oso ona dela diote.

Lurpeko errizometatik sortutako hosto zabalak metro beteraino garatu ohi dira eta lorazaintzan ere gero eta gehiago erabiltzen da. Errizoma egosi, zuritu, zortzi bat egunez eguzkitan lehortu eta ehotuta sortzen da kurkuma espezia. Inguruko sukaldariek kurkuma gero eta gehiago erabiltzen dutela jabetzeko moko finegia ez da izan behar, ala...

Espainia bigarren lekuan agertzen da Europako Batasuneko herrialdeen artean, gazteen cannabis-kontsumoari dagokionez, eta bere aurretik Frantzia bakarrik dago. Europako Batzordeak 15 estatu kideen artean iritzi-inkesta bat egiteko eskatu zion Eurobarometro izeneko erakundeari, 15 eta 24 urte bitarteko gazteen drogei buruzko jarrerak eta iritziak ezagutu nahian, eta asmo horrekin 16.129 gazte inkestatu zituzten, hau da mila gazte inguru herrialde bakoitzeko.

Cannabisa kontsumitzen dutenak %19,8 dira Frantzian, eta Espainian berriz %15ak aitortu zuen droga hori kontsumitu zuela azken hilabetean. EBko batez besteko zifra %11,3koa da, tabakoaren eta alkoholaren antzeko mailetan.
Drogatzat jotzen diren substantziak lortzeko erraztasunaz galdetu zitzaienean, Espainiako gazteen %90ak dio oso erraza dela droga erostea pub edo club moduko establezimenduetan, eta askoz ere arriskutsuagoa eta latzagoa dena, %66,2ak dioenez nahiko erraz lortzen omen da eskoletatik gertu.
Beste droga klase batzuetara pasatuz, gazte espainolen %85ak uste du heroinaren kontsumoak ondorio oso arriskutsuak dituela eta %65ak antzekoa dio estasiaren inguruan. Baina kontsumoa cannabisarena denean, %23 bakarrik dira ohitura hori arriskutsutzat jotzen dutenak. Normalean mutilek neskek baino droga gehiago kontsumitzen dituzte, zenbat eta ikasketa aldi luzeagoa orduan eta droga gutxiago kontsumitzen da, eta hirietan droga gehiago kontsumitzen da landa zonetan baino, cannabis-aren kasuan izan ezik