Argia astekaria webgunearen hasiera

Pinu mozorro edo pinu beldarra (Thaumetopoea pityocampa), Mediterraneoko ohiko espeziea da. Baina munduko leku askotan aurkituko dugu: Portugal, Frantzia, Alemania, Hungaria, Egipto, Israel, Palestina, Libia, Maroko...

Zedro eta pinu mota guztiak erasotzen ditu, bertakoak nahiz kanpotik ekarritakoak.
Eme helduek, pinuen azikulatan (hostoetan) jartzen dituzte arrautzak, ikusmenak eta usaimenak gidaturik. Azikula egokienak aukeratu ostean, hankekin txorten bereko beste azikulak apartatzen dituzte arrautzak askatuaz. Errunaldi bakoitzean 120-300 bitarte arrautza jartzen dituzte eta hori guztia abdomeneko ezkatekin biltzen dute babestearren. Jaio eta berehala sortu bereko lekuan elikatzen dira. Guztira bost larba fase izaten dituzte. Lehenengo muda, 8-12 egunetara gertatzen da, bigarren larba fasera pasatuaz, 12-18 egun irauten dituenak. Hirugarren larba faseak 30 egun irauten ditu eta fase honetan eratzen dira neguko habiak edo guk pinutan ikusten ditugun poltsak. Fase honetan, muda ondoren, beldarrak ohiko itxura hartzen du, desberdina dena zona bakoitzean bertako baldintza klimatikoak medio. Eta fase honetan eratzen ditu baita azkon erresumingarriak, gizakiontzat hain kaltegarri direnak, sortzen dituzten alergiak direla-eta. Beldarra geldi dagoenean, azkon erresumingarriak, gailu baten barne mantentzen dira baina astintzen bada, azkonak askatzen ditu. Bosgarren fasean, aktiboki elikatzen direnez, beldar kolonia bizi deneko pinua guztiz soiltzera iritsi daitezke. Azikula guztiak ondo aprobetxatu ondoren, prozesioan irtengo dira beste biktima baten bila.
Beldarrak helduak direnean, emea buru dutela, lurrera jaitsiko dira bertan lurperatuaz krisalidak eratzeko. Metamorfosiaren ondoren, tximeleta jaioko da. Hainbat pinu jaberen buruhauste bilakatu den intsektu honekin akabatzeko, metodo desberdinak daude: poltsen suntsiketa zuhaitzetik moztu eta ondoren erre, zanpatu edo eskopetaz tirokatuz, feromonen tranpak erabiltzea arrak gutxitzeko... baina erabilgarriena tratamendu kimiko masiboa izaten da, beldarrekin batera bizidun ugari deusezten dituena. Eta beldarrek bere horretan jarraitzen dute