Argia astekaria webgunearen hasiera

Iaz, 2002. urtean, 2001ean baino are prekarioagoak izan ziren laneko baldintzak. Hala ematen dute aditzera, bederen, INEM erakundeak argitaratu datu ofizialek. Horregatik, aurtengo negoziazioko eskaeretan, sindikatuek oso bere egin dute enplegu finko eta iraunekoaren aldarria, bereziki gazteek eta emakumeek nozitzen duten prekariotasuna baztertzeko asmotan. Izan ere, iaz, Hegoaldean bertan, izenpetu 100 kontratuetatik 9 bakarrik izan ziren finkoak. Zehazkiago esanda, %7,96koa izan zen tasa EAEn eta %10,08koa Nafarroan. Datuak bestela adierazita, iaz Hego Euskal Herrian izenpetu ziren kontratuen %91,6 zen hitzarmen tenporala. Datu ofizialetan oin hartuta LAB sindikatuak oraintsu egindako azterlan baten arabera, 2002. urtean INEM erakundean erregistratu ziren 900.000 kontratuetatik 75.562 bakarrik izan ziren mugagabeak, hau da, 2001. urtean baino %4 gutxiago. Horrez gainera, hona hemen beste datu esanguratsu hau: iraupen jakineko kontratu tenporalen %75,8 hiru hilabetez beherakoak izan ziren, eta %98,8 urtebetez azpikoak.

Datuak lurraldeka aztertuz gero, Nafarroan gertatu zen jokabide onena: %10,08 tasara heldu ziren han kontratu finkoetan. Ondoz ondo, honela ibili ziren gainerakoetan: %10,05eko tasa Araban, %7,98koa Gipuzkoan eta %7,38koa Bizkaian. EAEri gagozkiola, 708.086 kontratu erregistratu ziren INEMen. Zifra horretan, 56.332 izan ziren mugagabeak. Datu horiek lurraldeka hartuta, 398.907 kontratu guztira eta 29.454 kontratu mugagabe egin ziren Bizkaian, 203.053 kontratu eta 16.212 mugagabe Gipuzkoan eta 106.126 kontratu eta 10.666 mugagabe Araban.
Sindikatuen iritziz, lan baldintza prekario horiek dira, besteak beste, lanpostuetan egunero gertatzen diren laneko istripuen iturri, eta oso bereziki eraikuntzako sektorean gertatzen direnen sorburu