Argia astekaria webgunearen hasiera

Gaur egun euskaraz eta aldizkotasun finkoarekin argitaratzen den komiki aldizkari bakarra da. Hilabetero argitaratzen da, 7 eta 14 urte bitarteko haurrei denborapasa eskaini nahian. Mende laurdena bete berritan, osasuntsu ageri da aldizkaria eta aurrera begirako erronka berriekin.

Urteen joanak, aldaketak ere ekarri ditu. Gaur egun argitalpena zuzentzen duen Jon San Sebastianen arabera, "batetik, komikien edukiak, teknologiarekin edota aktualitatearekin lotu egiten dira askotan. Eta bestetik, marrazkiak ere desberdinak dira, hobeak nire ustez, teknologia aldatu delako. Ordenadorez margotzen dira marrazkiak gaur egun eta marrazkilariak kanpoko tendentziak eta teknika berriak ikasten ditu".
Hilean 6.000 aleko tirada du "Ipurbeltz"ek eta gehienbat, harpidetza bidez banatzen da.
Hasieratik argi izan zuen "Ipurbeltz"ek, ez zuela erreminta didaktikoa izan nahi, denborapasarako tresna baizik. Ezinbestean, ordea jostailuak badauka osagai hezitzailea ere. Dena den, Jon San Sebastianen iritziz, "gaur egun txikiagoa da eduki dezakeen eragina, gaztetxo baten inguruan, lehen baino gauza gehiago daudelako".
Eragina izan ala ez, argi dago "Ipurbeltz"ek 25 urteotan lortu duela Euskal Herriko gaztetxoen artean txoko bat egitea. Are gehiago, badira nerabezaroa aspaldi atzean utzi arren, oraindik ere hilabetero "Ipurbeltz" etxean jaso eta irakurtzen dutenak.
Bide luze hori egiteak lanak eman ditu eta aldizkariko arduradunak saiatu izan dira, aldizkariaz gain, beste hainbat ekimen ere gauzatzen. Orain begibistan dutena, komiki lehiaketa bat da. Komikiari bultzada bat eman nahian, 14 urte arteko gazteei orri bateko komikia osatzeko proposamena egin diete