Atzean utzi dugun 2002ko abenduaren 11n Buber Sariak banatu ziren Bilboko Euskalduna Jauregian egin zen «03 Datorrena» ekitaldiaren baitan. Irungo Udalak eskuratu zuen euskal web gune onenaren saria. Sari banaketaren aurretik zenbait adituk 2003. urteak teknologia berrien munduari zer ekarriko zion aurreikusi zuen. Guztira hamaika izan ziren «azti» lanetan aritu zirenak: Roberto Agirrezabala, Adclick egitasmoaren sortzailea; Imanol Alberdi, Internauten Elkarteko kide sortzailea; Joaquin Almunia, Espainiako Diputatuen Kongresuko Aurrekontu Batzordeko burua; Iñigo Atxutegi, Bizkaiko Foru Aldundiko Ekonomi Sustapenerako zuzendaria; Javier Etxebeste, Yahoo! Europako zuzendaria; Maria Goti, «El Correo Digital»eko zuzendari kudeatzailea; Enrique Martin, Filetopiaren sortzailea; Jose Antonio del Moral, Euskadi buletinaren editorea; Mikel Murga, Massachusetts Institute of Technology erakundeko irakaslea eta ikertzailea; Pello Salaburu, EHUko errektore ohia eta Euskaltzaindiako kidea eta Mikel Urizarbarrena, Panda Software enpresako lehendakaria.

Hainbat eta hainbat iragarpen, desio eta premia entzun eta atsedenalditxo bat egin ondoren, guztiek espero zuten unea heldu zen. Buber Sarien banaketaren unea. Duela hiru urte sortu zen sariketa hau, eta denbora igaro ahala gero eta ospe gehiago du.

Buber izena Idaho-tik (AEB) dator. Buber bezala ezaguna zen Blas Pedro Uberuagak, euskal artzain batzuen semeak 1994an Euskal Herriari buruzko informazioa eskaintzen zuen lehen web gunea sortu zuen. Zenbait urtetan Buberren orria izan zen euskal kulturaren erreferentzia bakarra Interneten.

Gaur egun Uberuagaren orriak Euskal Herriari buruzko informazio eskaerak jasotzen jarraitzen duen arren, ziur Buber izena, Euskal Herrian behintzat, sariengatik dela ezagunago. Baina zer dira? Nork antolatzen ditu?

Euskadi buletin elektronikoak bideratu izan du sariketa hau hasiera hasieratik. Lehenengo bi urtetan Gipuzkoako Merkataritza Ganbarak antolatutako «Euskadi Internet» ekitaldiaren baitan banatu ziren. Aurten ordea, ekitaldi hori ez da egin eta ekimenaren antolatzaile eta babesle honako hauek izan dira: Bizkaiko Foru Aldundia, El Correo taldea, SPRI, Euskaltel eta EITB. Buberrekin Euskal Herriko web guneak saritu nahi dira atal desberdinetan. Beraz, atal bakoitzeko irabazle bat dago eta horretaz gain irabazle nagusiaren saria ere badago. Urtetik urtera finalistak eta irabazleak aukeratzeko modua zertxobait aldatu egin da. 2002ko Buber Sarietarako jarraitutako metodologia honako hau izan zen: Jendeak urte osoan zehar bere proposamenak luzatu zituen. Proposamen horiek aurrean izanik epaimahaiko kideek atal bakoitzeko bi finalistak aukeratu zituzten eta azkeneko erabakia berriro ere gizartearen eskutan geratu zen, jendearen botoen arabera aukeratu baitziren irabazleak. Prozesu horretan ganbaran geratu ziren euskal web gune horietako batzuk ezagutu nahi izan ditugu eta horretarako epaimahaiko kide batengana jo dugu, Valentin Garcia Bizkaiko Foru Aldundiko Lantik-eko Berrikuntza buruarengana hain zuzen ere. Guztira 80 inguru izan dira bidean geratutako web guneak. Batzuk aipatzearren, eustat.es, putalocura.com, realsociedad.com, osasuna.es, irusoin.com, mcc.es, koipe.es, begira.com, sustatu.com, gara.net, kafeantzokia.com, uztarria.com, guay.com... Guztiek merezi dute aipamena