«Sarritan bakarrik aurkitzen zara, inolako laguntzarik gabe»
Ane Urizar IKT Informazio eta Komunikazio Departamenduko langilea (Mondragon Unibertsitatea) izateaz gain, Hizkuntzen Psikopedagogia lizentzia ari da ikasten on line. Beraz, ederki daki zein izan ohi diren ikaslearen oztopoak ordenagailuaren aurrean bakar bakarrik aurkitzen denean.
Zergatik on line ikasketak. Esaterako dirua aurrezten al da?
Leku batetik bestera mugitu behar ez duzunez, gastuak murrizten dira. Baina bestalde, badira beste gastu batzuk. Adibidez, ikasketak egiteko ordenagailu apropos bat izatea beharrezkoa da, konexio apropos batekin eta abar. Garrantzitsuena denboraren kontua da. Etxetik lan egiteko aukera ematen du, ahal duzun orduetan.
Irakasleek prestatuago egon behar dute on line ikasketak emateko?
On line ikastaroak ematen dituzten irakasle gehienen kezka da hori. Teknologia Berrietan trebea izan behar zara eta beste ikuspegi bat izan behar da. Orain arte ikastordu presentzialetan emandako edukiak on line emateko prestatu behar dira.
Ikasleek nola hartzen dituzte mota honetako ikasketak?
Ikasleek hasieran beldurra izaten dute. Azken finean norberak izan behar du bere lanaren kudeatzailea eta sarritan bakarrik aurkitzen zara etxean inolako laguntzarik gabe. Horregatik guk ikasleen harreta zerbitzua dugu lau orduz arratsaldez, ikasleek beren kezkak eta abar galdetzeko aukera izan dezaten. Laguntza teknikoa eta bestelakoa ere ematen diegu.
Zer ikasle motak aukeratzen ditu ikasketa mota hauek?
Gehienbat helduak dira. Askok seme-alabak dituzte, ezkonduta daude. Sarritan lehenago beste ikasketa batzuk zituen jendea da on line ikasketak egitera animatzen dena.
Zer moduz daramazu lana eta ikasketak batera uztartzea?
Denbora librea asko murrizten da. Gogorra da iluntzean etxera iritsi eta berriro ere lanean jartzea. Familia izanda, familiako erabakia izan behar du honelako ikasketak hastea, ez norberarena bakarrik
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa