Argia astekaria webgunearen hasiera

Euskal Herrian on line ikastaroak eskaintzen dituzten instituzio, unibertsitate edo elkarteak ez dira gehiegi. Europarekin parekatuz gero, oraindik atzean gaude, baina gero eta gehiago dira modu honetako ikasketak egitera animatzen direnak eta ondorioz, eskaintza ere handituz doa. Baina on line ikasketek zerbait ahalbidetzen badute espazioaren muga haustea da. Horrela, euskaldunok atzerriko unibertsitateetan ikas dezakegun heinean, atzerritarrek ere geurean ikas dezakete. Jarraian etxeko eskaintzaren errepaso txiki bat egingo dugu, ikuspegia zabaltzeak gai honi orrialde kopuru gehiago eskaintzea eskatuko bailuke.

EHUk, Deustuko eta Nafarroako Unibertsitateek eta Mondragon Unibertsitateko Humanitate eta Hezkuntza Zientzietako Fakultateek Internetera salto egin dute. Guztietatik ikasle eta eskaintza kopuru handiena EHUrena da. Iazko ikasturtean 1.661 ikasle eta 75 irakasgai izan zituzten. Noski, Bergaran egoitza duen UNED ere ezin dugu ahaztu.

1999an hasi zuen Zabalnetek bere ibilbidea, hezkuntza profesionala eta Internet uztartu asmoz. Gaur egun, ikastaroak emateaz gain, azpiegitura bera ere merkaturatzen du. 2002ko irailetik aurrera Elgoibarko Makina Erremintaren Institutuak ere hezkuntza profesionalari dagozkion 16 ikastaro on line eskainiko ditu.

1997an hasi zen on line ikastaroak eskaintzen. Hortik aurrera, pixkanaka urtez urte eskaintza handituz joan da. Hurrengo ikasturteari begira zortzi ikastaro eskainiko dituzte.

Habek iazko ikasturtean irakasleei zuzendutako bi ikastaro eman zituen on line. Ikasleei zuzendutako euskara ikastaroak berriz, Hezinet autoikaskuntzarako programaren baitan biltzen ditu. Gainera euskara ikasi nahi duen ororentzat lagungarri izan litekeen aldizkari elektroniko bat ere osatzen du Habek.