Argia astekaria webgunearen hasiera

Ez da, ez, lehenengo aldia orri hauetan horrelako zerbait eskatzen duguna. Eta, ziurrenik, ez da azkena izango. Euskal Herriko edozein arlori buruzko estatistikak edo gizarte arloko datuak ematen direnean, betiko hutsune berbera aurkitzen dugu: gaur egun, ez dago inolako euskal erakunderik -hizkuntzaren arloko Euskaltzaindia izan ezik- Euskal Herri osoko errealitateari buruzko estatistikak, azterketak edo ikerketak eskaintzeko. Egiten diren guztiak azterketa edo ikerketa partzialak izan ohi dira, herrialde bakoitzari edo gehienez ere EAEri edo Nafarroari dagozkionak. Orri hauetan beraietan ikus dezakegunez, BBK-k egiten duen azterketa hori EAEko lan merkatuari atxikitzen zaio. Noiz edo noiz, esaterako, Euskadiko Kutxak euskal ekonomiari buruz egiten duen urteko azterketan, Hego Euskal Herria hartzen da azterketarako esparru gisa. Enpresa pribatuei, agian, ezin zaie horrelako ahaleginik eskatu. Eta gaur egungo egoera politikoan Euskal Herriak hiru administraziotan zatiturik jarraitzen du, eta horietako bakoitzak ez ikusia egiten du, bere lurralde mugatutik ateratzeari muzin eginez. Egoera horrek irauten duen bitartean, oraingoz, lan hori bere gain har lezakeen erakundea Udalbiltza izan liteke, nahiz eta horretarako elkartasuna, giza baliabideak eta dirua behar diren. Baina horretan borondate politikoa nagusitzen da. Balego, ederki!