Argia astekaria webgunearen hasiera

Izen horrexe duen inkesta bat egin du BBK Fundazioak Gaztelanbideanen eskutik. Lan horren helburu nagusia Bizkaiko gazteak lan merkatuan barneratzeko erabiltzen dituzten prozesuak ezagutzea da. Beraz, gazteen eta lan merkatuaren arteko egoera aztertu eta lotura horretan zein alderdik eragiten duten ikertu nahi da. Gainera, lana lortu duten gazteek zer-nolako prozesua burutu duten jakiteko bidean sakondu nahi da, eta zein den lortu nahian dabiltzanek daramaten prozesua.

Horretarako, 21 eta 29 urte bitarteko 1.200 gazteren artean egin du inkesta, lan merkatuan barneratzeko arazoei buruzko diagnosia egiteko egokienak direlakoan. Inkesta luzea eta zehaztasun handikoa da, besteak beste, familiaren abiapuntua, ikasketa maila eta ikasketak egin bitartean izandako lan esperientzia aztertuz. Ezaugarri horiek lanpostu bat lortzeko xedez erabilitako baliabide eta mekanismoetan eta lortutako lanpostuaren ezaugarrietan eta mailan, zenbaterainoko eragina duten jakin nahi da.
Inkestan bildutako gazteen erdia baino gehiago soldatapean dago (%51,3). Bigarren multzo garrantzitsuena lan bila dabilen langabeena da (%38,8). Hirugarren multzoa, berriz, bere kasa lanean ari diren gazteena da (%5,7). Horien ondoren, langabeak izan arren lan bila ez dabiltzanak (%2,8) eta familiako lanetan laguntzen dutenak (%2) daude. Lortutako emaitzak, inkesta egin dutenen ustez, interesgarriak dira, eta are oso interesgarriak ere badirela esan daiteke sustapen jarduera publikoetan nahiz pribatuetan edo gazteak laneratzeko jarduerak bultzatzeko ahaleginetan aritzen direnentzat