Iazko abenduaren lehenengoan «Goienkaria» jaio zen, Debagoieneko euskararen aldeko taldeen eta Goiena komunikazio kooperatibaren ekimenez. Euskara hutsez Debagoiena eskualdean astean zehar kulturan, politikan, gizartean eta ekonomian gertatutakoen berri ematen du. Ostiralero hogeita bat mila ale doan zabaltzen ditu Arrasate, Bergara, Oñati, Aretxabaleta, Eskoriatza, Antzuola, Elgeta, Aramaio eta Leintz Gatzagan barrena. Astekaria izan arren, «Goienkaria»k egunkari formatoa du, eta erredakzio nagusia Bergaran dago.
«Goienkaria»ko zuzendari Eneko Azkaratek azaldu duenez, "bat-egitearen arrazoietako bat ekonomikoa da; errotatiban aurrezten den dirua edukietan eta lan taldean inbertituko dugu, produktu hobea lortzeko". Bestalde, aipatu beharra dago Debagoiena bailara subjektu bezala aintzat hartzen zuen aldizkari baten beharra sumatu zutela zenbait euskara talde eta komunikabidek.
Hizkuntzari dagokionez, «Goienkaria»ko orrialdeetan euskara batuak nagusi izaten darrai, eta, era berean, tokian tokiko euskarak presentzia handiagoa du herri aldizkari berrituetan.
"Urte luzetan herri aldizkari bakoitzak bere aldetik jo du, eta bat-egitea ez da samurra izan, baina denontzat hobea izango zela erabaki genuen", dio «Goienkaria»ko zuzendari Eneko Azkaratek. Dena den, herri aldizkarien birmoldaketaren aurkakoak ere egon dira, jende askok pena handia hartu baitu ohiko aldizkariak gehiago ikusiko ez dituelako.
Iker Barandiaran «Arrasate Press»eko zuzendari eta koordinatzaileren ustez, "herri txikiak izango dira bat-egiteari esker gehien irabaziko dutenak", maiztasun txikiko aldizkariak edukitzetik astero-astero «Goienkaria»n lekua izatera igaroko baitira. Halaber, "herriotako erakundeak, taldeak eta herritarrak ez daude kazetarien galderei erantzutera ohituta, eta horrek kazetariaren lana zailtzen du", gaineratu du Barandiaranek.
Edizioei dagokienez, ez da ezberdintasun handirik, hirurek gai beretsuak jorratzen dituztelako, eta atalak ere antzekoak direlako. Erakargarriagoak eta irakurterrazagoak izateko asmoz, argazkien tamaina handitu eta testuen pisua txikitu dute herri aldizkari berrituetan.
Debagoienan agerkari eta herri aldizkari ugari egon dira. 1988an Arrasate Euskaldun Dezagun taldeko lagunek abian jarritako «Arrasate Press» Euskal Herriko herri aldizkarien aitzindarietako bat dugu. Astekari honek bere gorenean 6.400 aletako tirada izan du. «Berrigara» astekariak eta «Antzuolako Kontuola» hamabostekariak bien artean, berriz, 5.400 ale banatu dituzte oraino. Era berean, Aretxabaletako berrietaz arduratzen zen «Aretxagazeta» hamabostekari zaharrak 1.500 ale kaleratzen zituen. «Ze Barri?»k Eskoriatza eta Leintz Gatzagako berri hilabetean behin ematen zuen eta 1.700eko tirada zuen. Elgetako «Goibekokale» hilabetekariak 650 ale banatzen zituen. «Txirritola» orri informatiboa hiru hilabetean behin argitaratzen zen Aramaion izen bereko euskara taldearen eskutik. «Kontzejupetik» hilabetekari oñatiarra «Goienkaria» berrian sartu ez den herri aldizkari bakarra dugu. Izan ere, ez du Goiena bere kudeaketaz arduratzea nahi, eta bertako udalaren eskuetan darrai. Dena den, oñatiarrek Goienkaria jasotzen dute ostiralero beren gutunontzietan. «Kontzejupetik» aldizkariak 4.500 ale banatzen ditu
© 2008-2011 Argia.com - Komunikazio Biziagoa
Erreportajea 
