Argia astekaria webgunearen hasiera

- Xabi Larralde, Batasunako Mahai Nazionaleko kidea "Gara"n: "Bereizketaren gakoa ibilmolde nazionalean dago gehiago, proiektu nazionala nola gauzatu behar den planteatzerako garaian. Hortaz, Batasunaren bideari une honetan jarraitzeko prest ez zirela erabaki zuen gehiengoak. Dena den, azkenik Euskal Herri osoko ezker abertzalearen antolakunde bateratu batera iritsiko garela pentsatzen dugu".
- Jean-Noel Etxeberri 'Txetx', ABko bozeramailea 'Egunkaria'n: "Hor dago Lizarra-Garaziko oinarrietariko bat: nola ekarri PSOEko sektore batzuk Lizarra-Garaziko izpiritu eta forora. Elkarri-ren konferentzia, alde horretatik, esperantzagarria da".
- Josu Jon Imaz, Eusko Jaurlaritzako bozeramailea: "Ertzaintzaren eta gainerako segurtasun indarren laguntzarekin, euskal gizarteak ETArekin amaitu behar du»
- Arnaldo Otegi, Batasunako eleduna: "Ezin dezakegu beste 25 urte pasatzen utzi, eta herri honetako eztabaidarik garrantzitsuena pasatzen utzi, hau da autodeterminazioarena; bide horretatik eraman behar dugu Euskal Herria beste estatus juridiko-politiko batera".

Jose Antonio Urbiola EAJko EBBko buruzagi nafarraren esanetan, Nafarroako abertzaleen botoa oso sakabanatua dago eta, bere ustez, EAJ, EA, Batzarre eta Aralarren artean elkarrizketari ekin beharko litzaioke egoera honi itzulia nola eman pentsatzen hasteko. Apurka gerturatzen ari da 2003ko udal eta foru hauteskundeen itzala.
Zabalik informazio egitasmo digitala abian jarri du Eusko Legebiltzarrak. Interesatuak interneten jarritako gai zerrenda batean gai desberdinen arteko hautaketa egin ahal izango du eta harpidetza egin ondoren, gai horiei buruz Legebiltzarrean jorratutakoa jasoko du.

Jesus Egiguren PSE-EEko buruzagiak sozialisten barne eztabaidarako prestatutako txostenak, autodeterminazioari buruzko eztabaida eta bermeekin egindako herri kontsulta onartuko lituzkeela azpimarratzen du. Egigurenen ustez, kontua ez da herri kontsulta baten aurrean ateak zabaltzen dituela, Jaurlaritzak berau egiteko asmoarekin jarraitzen badu, ate hori ixtea ezinezkoa dela baizik.

Azpelarrak eman dio ongi etorria freskurari. Espaloietatik pixka bat urrutiratzea nahikoa izango duzu loretxo honen ubel ajatu eta laranja mina nahasketa dotorea belazeetan barreiatuta ikusteko. Azpelarra, Colchicum autumnale, ganadu mendizaleen belazeetan eta bere bestengusu azafraia, Crocus sativus, hego muturreko soro lehorretan. Antza izugarria dute, bata basaka eta bestea landua izatea, ordea. Landua... ondo landua, alajainena... Lore tiki honen estigma eta estilo nimiño lehorrak dira saltzen den azafraia. Milioi bat loretik biltzen da azafrai kiloa... Kilo hori bi edo hiru mila euro ordaintzen da, aho-sabaia kitzikatze artean azafraiaren estimazioa gutxik baitute. B bitamina gehien duen jakia omen da eta Espainian arteroesklerosiak eta bihotzeko gaixotasunek duten eragin tikiaren arrazoitzat jotzen da.

Euskal Herrian azafraia jateko ohitura ia galdu da; eskerrak arabierako» az-zaferán» edo «az-zafarán» hitzetatik datorren izenari behintzat eusten diogun. Izena bezala, azafraia arabiarrengandik jasotako ondarea da. «Karkom» semitikotik datorren grekoko «krôkôs» da Crocus izenaren jatorria. Kristo aurreko 1600 urteko zeramika eta margoetan azaltzen da "karkom"a. Afrika iparraldea eta ekialde hurbilean lehen bezala orain garrantzi itzela duen semitiko beretik omen datoz, besteak beste, hebraiera eta arabiera

Kirurgia da joanikoteen tratamenduan aukera edo alternatibarik eraginkorrena". Horrelaxe mintzatu zen Carlos Villas doktorea, Nafarroako Klinika Unibertsitarioko Kirurgia Ortopediko eta Traumatologiako espezialista, Iruñean duela hilabete batzuk gai horren inguruan egin ziren jardunaldietan.

Joanikotea (hallux valgas ere esaten diogu medikuek), behatz lodiak bere metatartso hezurrarekin duen deformazioa da, behatz hori gainerako behatzen aldera desbideratzen delarik. Zer gertatzen da deformazio horretan? Pertsona horiek behatz potoloa beste behatzen tamaina berekoa izaten dute (edo baita luzeagoa ere), laburragoa izan ordez. Eta gainera arazoa areagotu egin ohi da oinetako desegokiak erabiltzeagatik.
Pertsona gazteengan izan ezik, joanikotea ez da bakarrik behatz lodiaren oinaldean (basean) agertzen den konkor edo bultoa, zoritxarrez beste hainbat ondorio ere izaten baititu. Villas doktoreak azpimarratu zuenez, "50 urtetik gorako pertsonetan artrosia agertu ohi da lehenengo behatzaren artikulazioetan, eta aldameneko behatzak erpe moduan uzkurtuak edo lokatuak egoten dira, eta oinzola edo oinazpian mina sentitzen da".
Printzipioz gizonezko eta emakumezkoek joanikoteak edukitzeko joera bera dugun arren, emakumeen oinetakoak estuagoak izaten direnez, behatz lodia, luzeagoa, gehiago estutu eta behartzen da. Horregatik mina eta deformazioa areagotu egiten dira urteekin. Eta konponbidea zein da? Kirurgia, bi aukerarekin: behatz lodiaren kanpoko aldeko konkorra limatzea batetik, edota arazoaren sustraira jotzea eta deformitatea konpontzen saiatzea bestetik

DONOSTIAKO udalean PP eta PSE-EEk duten akordia bere une larrienetik iragan da 1999ko udal hauteskundeen ondoren gobernu akordioa gauzatu zenetik. Akordioaren ibilbideak tentsio une ugari izan ditu une desberdinetan, baina inoiz ez da apurketatik horren gertu izan. Udal politikatik haratago doan auzia da zalantzarik gabe, Estatu mailan PP eta PSEren artean izandako ika-mikek adierazten duten bezala; iaz egindako Terrorismoaren aurkako Itunaren apurketaren erreferentziaren bat ere entzun ahal izan zen Madrilen. Indikadore askoren arabera, dena den, PP eta PSOEren arteko tentsioen hasiera besterik ez da seguruenik; elkar gurutzatzen dituzten adierazpenek ere hori bera adierazten dute.

ABERTZALEEN Batasuna eta Batasunaren arteko banaketa giro lasaian egin dela azpimarratu dute alde bietako kideek. Etorkizunean zenbait alorretan aurrez aurre aritzeko beldurrak ere eragina izan du adierazpen horietan. Edozein eratan, lasaitasunak ezin izan du ezabatu Iparraldeko ezker abertzalea batzearen alde horrenbesteko urteetako ahaleginak porrot egin izanak utzi duen halako zapore hits eta mingotsa. Alde biek azpimarratu dute honakoa: izango da elkar lanean aritzeko tarterik. Eta politikaren izaera kontuan hartuta, elkarren aurrez aurre ere bai seguruenik.

MADRILEN hilaren 12an eztanda egindako bonba autoaren auziak aurrera jarraitzen du eta polizia espainiarrak, lehergailua zergatik ez zen aurkitu jakin ahal izateko ikerketa zabaldu du. PSOEk eta Ezker Batuak segurtasun indarren hutsegitearen azalpenak eskatu dituzte; iragan abenduan Terrorismoaren aurkako ituna sinatu zenetik, sozialistek ETArekin zerikusirik duen gai batean PPri azalpenak eskatzen dizkioten lehen aldia da. Madrilen 12an egin zen desfile militarrarekin denboran bat eginda lehertu zedin pentsatua zegoen lehergailua, baina ordutegi akats bategatik, goizez eztanda egin beharrean gauez lehertu zen, 17 pertsona zaurituz eta kalte material ugari eraginez.

EUSKAL Herritarrek dituzten eskubide zibil eta politikoei buruzko ekimena abiaraziko du Batasunak. Horretarako, lehenbiziko urrats batean Lizarra-Garaziko akordioa sinatu zuten indarrekin bildu nahi dute Batasunakoek, nahiz eta gainerako indarrekin biltzeko prestutasuna ere azaldu duten. Azken hilabeteetan dagoen komunikazio hutsunea bete nahi dute elkarrizketa txanda honekin eta egungo egoera politikoaren azterketa bateratua egin. Eskubide zibilen artean, autodeterminazio eskubideak duen garrantzia azpimarratu dute Batasunatik. Batasunaren diskurtsoan azken asteotan autoderminazio hitza maiatzaren 13ko hauteskunde aurreko garaian ez bezala errepikatzen ari dela ez da oharkabean pasatu.

FRANTZIA eta Espainiako gobernuek terrorismo delituengatik atxilotutako presoen aldi baterako entregak hitzartu dituzte. Honen arabera, esaterako, Frantziak preso bat Espainian epaitu dezaten entregatu ahal izango du, nahiz eta Frantzian auziren bat edo kartzela zigorra betetzeke izan. Ez da erraza jakitea, neurriok aurretik aurreikusita zirelako, baina agian EEBBetako irailaren 11ko atentatuen ondorengo lehen eraginak ere hasi dira sumatzen Euskal Herriak bizi duen gatazkan. Estatuek abagunea nola ari diren probesten ikusita, azkena ere ez da izango seguruenik.

QUEBECEKO Justizia Auzitegi Gorenaren aginduz, urriaren 30 eta 31n egingo da Gorka Perea eta Eduardo Plagaro euskal errefuxiatuen aurkako estradizio epaiketa. Fiskaltzak azkartasun handiz erantzun nahi izan dio Espainak egindako estradizio eskaerari; errefuxiatuen abokatu John Philpot eta Pierre Poupard-ek, aldiz, Espainian ideia politikoengatik dagoen jazarpena mahaigaineratu dute eta bi errefuxiatuak zigortu zituztenean berme politikorik ote zen zalantzan jarri. Honen guztiaren ondorioz, epaiketa luze joango dela aurreikus liteke.