Independentzia eta autonomia «Independentista naiz eta ñabardurarik gabe, hori garbi daukat»
Hauteskunde autonomikoen ostean, EAJko zure bozeramaile kargua uzteko proposatu zuten EBBko hainbat kidek. Antza, emaitzak onak izanda ere, zure jarduerak ikara sortarazten du alderdian?
Beno, badakizu, etxe guztietan prebentzioak daude. Egoerari buruzko irakurketa ezberdinak daude. Hala ere, EAJren bidea Lizarra-Garaziko Akordioak utzitako arrastoan dago. Bide honetan, ETAk markatu nahi duen bidetik ez dagoela aurrera joaterik esan dio ETAri gizarteak. EAJ-EA koalizioak geure irakurketa politikoa egin dugu. Bildu dugun botoa, boto abertzalea da, demokrata, eta bide demokratikotik jarraituz gero herri honen etorkizuna irabaziko dugulakoan gaude.
Autonomiazalea eta subiranozaleak elkarrekin bide egoteko moduan al zaudete EAJn? Zeure joera mantenduko ote da alderdian?
Politikoak politikagintzako tresnak gara. Badakigu denok marketinak zer garrantzia duen politikan. EAJren barrutik irtendako ponentziak eztabaidatu eta erabaki ditugu azken lau urteetan. EAJren norabide politikoa nondik nora doan garbi dago. Egoera politikoak baldintzatzen du norabidearen abiadura eta hori eztabaidagarria izan daiteke gure zuzendaritzan. EAJren hautesleriari dagokionez, abertzale eta abertzaletasuna epelago sentitzen dutenak egon daitezke. Baina EAJren hautesleria nagusiki abertzalea da eta EAJko zuzendaritzak garbi eduki behar du zein den bere helburua. Hau da, EAJren zuzendaritzan ez da inor -eta ez da egongo- alderdiaren helburuak autonomia estatuarekin lortutzat emango dituenik. Ez dut esango zuzendaritzako kide guztiak independentista izan behar dutenik, baina bai Euskal Herriaren burujabetasuna eta justizian oinarritako proiektu bat landu behar dutela. Gipuzkoarra, nafarra edo Iparraldekoa izanagatik EAJko zuzendaritzak garbi izan behar du hori.
Independentista izate horretan ñabardurak egiten dituzu zuk?
Ez. Ni independentista naiz eta ñabardurarik gabe. Munduak nahiko dependentziak dauzka norbera aldez aurretik dependentea dela esateko. Norberak ahal den dependentzia gutxienarekin erabakiak hartzeko independentzia izan behar du helburu. Bizitzak dependentziak jartzen dituela jakinda ere, baita herriek dependentziak dituztela. Egungo abertzaleok geure buruaren jabe izan nahi baldin badugu, burujabetasunak erabakitzeko gaitasuna eman behar digu. Aldi berean bizi ditugun egoera politikoaren baldintzak kontuan hartu behar ditugu geure erabakiak eraginkorrak izan daitezen
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa