Argia astekaria webgunearen hasiera

Hilaren 17an ez da beste munduko kontzertu erraldoirik eta antzerako ekitaldi potolorik izango Argantzunen. Xumea izango da jaialdia. Programa arrunta izango du. Izango dira bai, bertsolariak, kantariak, musika taldeak... Hori guztia, baina, handinahirik gabe, era apal baten. Aurretik ere ez da egin beste batzuetan egin izan den moduko jaialdi itzelik. Maiatzean egin zuten kultur astea Argantzunen eta Gasteizen egin zen Euskal Herriko Haur Kantarien Txapelketako finala.

Egunean bertan, hiru gune nagusi izango dira zirkuituan: bata gazteentzat (Asgarth, bertsolariak...), bestea familian doazenentzat (pailazoak...) eta umeentzako bestea (EITBren gunea).

Zirkuituak bost kilometro eta erdi izango ditu bere osotasunean. Kilometrorik gehienak Argantzunen barruan egingo dira, baina herritik atera egingo da ibilbidea zati batzuetan. Ibilbidearen zati bat Zadorra ibaiaren ertzetik egingo da.

Patxi Zabaleta apaizari egingo zaio omenaldia Araba Euskarazen. Irakaslea ere bada Zabaleta eta euskararen sustapenean gogotsu lan egin du Araba aldean. Ekainaren 17an, Arabako ikastolen elkartearen eta Arabako euskalgintzaren aldeko mugimendu osoaren omenaldia jasoko du Argantzunen, esker onaren adierazgarri legez.