Argia astekaria webgunearen hasiera

Aurki, hemendik bizpahiru hilabetera, Hizkuntz Eskubideen Behatokia jarriko du abian Kontseiluak. Arlo publiko zein pribatuan hizkuntz eskubideak errespetarazteko asmoz, Behatokiak hainbat lan ildo jorratuko du.

Batetik "Euskararen Telefonoa" jarriko du martxan. Edozein herritar edo elkartek izango du bertara deitu eta euskararen aurkako erasoak salatzeko aukera. Salaketa jaso eta bideratuko ditu ondoren Behatokiak, salaketaren larritasunaren arabera maila desberdineko neurriak hartuz. Horrek ez du esan nahi salaketen zain egongo direnik neurri batzuk hartzeko. Erakunde publikoek hizkuntz eskubideak errespetatzen dituzten ikusteko azterketa sistematikoa egiteko asmoa agertu dute. Halaber, eskubideak urratzen direnean erakundearen aurka judizialki jotzeko aukera hartuko dute kontuan.

Bestalde, hizkuntz eskubideen egoeraz txostenak prestatu eta bideratzea ere Behatokiaren lana izango da. Urteroko maiztasunez burutuko ditu txostenok eta bertan erakunde publiko, alderdi politiko eta erakunde sozialei unean beharrezkoak diren neurriak hartzeko gomendioa luzatuko zaie. Hala ere, arazo garrantzitsuen aurrean txosten bereziak burutzea ere aurreikusi dute, baita, egoerak hala eskatzen duenean, nazioarteko istantzietara eta hizkuntz eskubideen aldeko gobernuz kanpoko erakundeetara jotzea ere.

Prebentzio lana ere egin nahi du Behatokiak. Horretarako, zabaltzeke dauden gune handiekin (merkataritza zentroak, museoak, kirol instalazioak, museoak...) harremanetan jartzeko asmoa du, hizkuntz eskubideak errespeta ditzaten eskatuz. Gaizki egindakoak zuzentzeaz gain, ongi egindakoak ere saritu nahi ditu, nolabait, Kontseiluak. Erakunde batek, pribatua zein publikoa izan, eta legez behartuta egon gabe ere, eskubide hauen aldeko aurrerapausoak burutu baditu, Behatokiak publikoki txalotuko du bere jarrera.

Hizkuntz eskubideen dibulgazioa egitea, hizkuntz eskubideen gaia aztertzeko jardunaldiak antolatzea, arazo konkretuei buruzko ikerketak bideratzea, nazioarteko adituen batzorde bat antolatzea eta bestelako lanak ere aurreikusten ditu Behatokiak goian aipatutako hiru arlo nagusiez gain.

Duela aste gutxi Paula Kasares iruindarra hautatu dute Behatokiaren arduradun eta administrari baten aukeraketan ere ari dira. Egoitza dagoeneko lortu dute Iruñean. Orain, antolaketa lanetan ari dira eta aurki "Euskararen "Telefonoa"ren zenbakia zabalduko diete herritarrei.