Argia astekaria webgunearen hasiera

Normalizazioan aurrepausoak bilatzen dituen erakundea izaki, atzerapausoen arriskuak ere kezkatzen du Kontseilua. Are gehiago azkenaldiko euskararen kontrako ofentsiba gogorra kontuan hartzen bada. Une kritikootan Kontseiluak erantzun beharra ikusten du. Horrela azken hilabeteotan bere desadostasuna eta kezka adierazi du AEKren aurka Garzon epaileak burututako erasoaldiaren aurrean eta Nafarroako Gobernuak hartutako neurrien aurrean.

Salaketa ez da Euskal Herrira mugatu eta nazioartean ere saiatu dira euren kezka agertzen. Aurtengo martxoan Xabier Mendiguren Bereziartu Kontseiluko idazkari nagusiak Euskara eta Euskal Hiztunen Eskubideen Egoeraren txostena aurkeztu zuen Estrasburgon. Maiatzean Ginebran burutu zen agerraldia, Nazio Batuen Giza Eskubideen Batzordeko lantalde batean. Bi kasuetan Nafarroako eta Iparraldeko egoerak nabarmendu zituen Kontseiluak.

Hemendik aurrera, ordea, erantzun bateratu eta indartsuagoa eman asmo dute. Horregatik larunbat honetan, hilak 16, burutuko den Batzar Ez Ohikoan Zuzendaritzak eta Idazkari Nagusiak Ekintza Plan bat aurkeztuko dute.

Proposamen honek herritarren parte hartze zabala erabili nahi du erasoen aurka, baita euskalgintzaren inplikazioa ere. Gizarte eragileen eta alderdi politikoen inplikazioa bideratzeko ekintzak ere aurreikusten ditu, baita nazioarteari begira lan egiteko beharra ere. Proposamenean garrantzi berezia ematen zaio, halaber, komunikazioari eta Internet bezalako tresnen erabilera ere aipatzen da. Dena den, oraindik ikusteke dago Batzarrak hartuko duen erabakia eta berau hartzean Kontseiluak Ekintza Plan honen nondik norakoak jakinaraziko ditu.