Argia astekaria webgunearen hasiera

Bai Euskarari Akordioaren bidez hainbat gizarte eragilek dagozkien neurri normalizatzaileak hartzeko konpromisoa hartu zuten. Konpromisoak hartzea ez da nahikoa, ordea. Horiek bete egin behar dira eta Kontseiluaren lana da horren jarraipena egitea. Horretarako tresna da Bai Euskarari Ziurtagiria, eragileei konpromisoak betetzean ematen zaiena. Duela urtebete Hegoaldeko 400dik gora eragileri eman zitzaion berau lortzeko aukera eta aurtengoan Iparraldeko eragileei ere eskaini zaie Ziurtagiria lortzeko parada.

Oraingoz orotara 316 Ziurtagiri banatu ditu Kontseiluak beste hainbeste gizarte eragileren artean. Kopuru honek nabarmen egin du gora azken asteotan EIEF-FERE kontseilukide berriaren eraginez. Izan ere, Euskadiko Irakaskuntzarako Erlijiosoen Federakuntzaren barruan dauden 80 ikastetxek eskuratu dute Bai Euskarari Ziurtagiria berriki.

Kopurua gora egiten ari delako gustura ageri dira Kontseiluko arduradunak. Baina baita dagoeneko Ziurtagiri hau lortu dutenak irudi hau gero eta gehiago erabiltzen ari direlako ere. Gizarte eragile horien barne informazioetan, agirietan edo publizitateetan, bestelako ziurtagiriekin batera, Bai Euskarari Ziurtagiria gero eta gehiagotan ikus daiteke. Kontseiluko kideen esanetan, seinale ona da hori eta Bai Euskarari Akordioarekin egin den ahaleginarentzat nolabaiteko errekonozimendua.