Argia astekaria webgunearen hasiera

Herrian, indarkeriari esker, egoera bat nagusitu eta luzaro irauten baldin badu, ba dirudi herritarrek, zapalketaren funtsa baztertuz, beste amets batzuk nahiago dituztela. Herriaren onak oporketa egitea eskatzen duenean, zenbaitek izanen du mila aitzakia. Ez zaio atsegin, ez. Herrikoia dela hitzez aitortuko du, baina patrikari behera eragiteak ez dakarkio gauza onik eta eragozpenak inguratuko ditu galerazteko. Herriaren iraupenak hizkuntza indartzea agintzen duenean, frantsesa eta ingelesa ikasten jardungo da eginahalean, eta euskera, gehienez gauza polit eta erromantikotzat joko dizu. Ez bait dio ondasunik ugaltzen. Herriak eskubideak ditu, bai. Baina, zertarako dituzu, gero geuk egiten ditugun makinak nori saldurik ez badugu? Herritarrok erbesteratu beharko genuke, eta hori hobea ahal litzateke? Gezurrezko galdera hauentzako bada erantzun sakonik, eta emanak izan dira ZERUKO ARGIAn, ekonomiari buruzko zenbait lanetan. Hala ere, atrika berodunen ahotan dabiltza gaur zoritxarrez holako sasi ertenbideak. Diruaren morroiek, onartuko dituzte Herri-eskubideak, hizkuntzak e.a. irabazirik baldin badakarkiete. Bestela hor utziko zaitu pikutara joaten zeure arrazoi eta nortasun guztiekin (...).