Argia astekaria webgunearen hasiera

Izotz-hockeyko partida hiru zatitan banatzen da eta zati bakoitzak 20 minutu irauten du. Futbolean zelaira hamaikako taldea ateratzen den bezala, izotz-hockey partida jokatzeko 12 jokalari behar dira. Lau laguneko lerroak prestatzen dira eta pistan minutua egiten dutenean aldatu egiten dira lerroak. Denboraldi hasieran talde txukun bat ateratzeko gutxienez 20 jokalari izatea komeni da. Talde gehienek batez beste 20-25 jokalariren fitxak egiten dituzte.
Izotz-hockeya kirol garestia da, ekipamendua eta materialak asko balio du: makilak, patinak, eskularruak... Elkarteak goi mailako jokalarientzat saiatzen dira materiala prestatzen (makilak, elastikoak, galtzetako forrua...) baina patinak, kaskoa eta izotz jokalari batek daraman gainerako ekipamendua norberak osatu behar du. Garai batean kirol hau aberatsena zen, baina elkarteak ez dutenez nahi hori gertatzerik, hau da, kirol klasista bihurtzerik, haur eta gazteentzako materiala erosten dute.
Izotz-hockeya praktikatzeko kirolari gogorra behar du izan, ez gizena, baina bai astuna. Beraz, 1'85 zentimetro neurtzen duen izotz jokalari batek 95 kilo izatea ohikoa da. Adin guztietako jokalariak aritu daitezke izotz-hockey talde batean. 18 urteko jokalari gazte onak badira eta 35 urteko nekagaitzak ere bai. Hala ere, jokalarien batez besteko adina 25-26 urtekoa da.