Neguaren ahultasunaz hitz egiten eman dugu negua eta pentsa zitekeen eran aurtengo urte osoko hizketagaia izango da. "Negu exkax hura" leloa makina bat aldiz entzutekoa naizela iruditzen zait, dagoeneko hasia bainaiz.

Tamainako euriteekin etorri zaigu udaberria eta loreen eta berdeen enbata polikromatu txoragarria bizitzen ari gara. Aurtengo izerdialdiaren sasoia izugarria da. Mina emateko dauden lagun-min gutxi horietako batek frutarboladi berria landatu berri du amonaren sailean eta ez naiz han izan zaharra. Landatutako bi eta hiru urtetako aranondo, gereziondo, muxikondo, brinoiondo, hurritz eta sagarrondoen pujak ikusteko modukoak dira; tartean nabarmen errezil-sagarrondoenak.

Haritzek ere olatuaren bitsa ezin

alferrik galtzen utzi. Gure aitonak

dio aspaldiko urteetan ez, baizik eta ia inoiz ez duela haritzen honelako hostoratze goiztiar, bapateko eta oparorik ezagutu. Xaguen herriko elezaharrak hala dio: "haritza lizarra baino lehenago hostotzen bada, erdipurdiko urtea". Udazkenean hartuko diogu urte guztiko bataz bestekoaren ipurdiari neurria, baina egunero ikusten ditudan haritz harrotxo horietako batzuk dagoenerako ederki jipoitu ditu zuriña edo oidioak. Onena etortzeko dago, hona dema: urik bada aurten ere onttotxoak nagusi

baietz