Argia astekaria webgunearen hasiera

Osasun bajak eta altak kudeatzeko ardura mutuen esku geratzeko PPren gobernuaren erabakia uda betean hartu zen. Horregatik, sindikatuek ezin izan dute behar bezala erantzun orain arte. Duela aste batzuek geroztik Hego Euskal Herriko ELA, LAB, ESK, EILAS eta CGT sindikatuek mobilizazioak bultzatzeari ekin diote Espainiako Gobernuak daraman pribatizazio politikaren aurka eta osasun arloko gizarte babesaren alde.
Mobilizazioak geroz eta gogorragoak izango dira Espainiako Gobernuak lege dekretu hori ezabatzeari uko egiten dion heinean. Dagoeneko eskuorri batzuk banatuak dituzte lantokietan, egoerari buruzko azalpenak emanez. Sindikatuek enpresetako batzorde eta ordezkari sindikalek idazki bat sinatzea nahi dute, gorabehera arrunten ondoriozko osasun prestazioak kudeatzearen ardura mutua patronalen esku geratzearen aurka. Halaber, gaixotasun arrunten edo lanekoak ez diren istripuen eraginez sortzen diren alta eta bajen osasun kontrola eta prestazio ekonomikoak kudeatzeko ardura mutuen esku uzteari uko egiteko eskatzen zaie enpresariei. Sindikatuen eskarien barruan sartzen da baita ere EAEko eta Nafarroako gobernuek lege espainiar hori arbuia dezaten, beren gaur egungo eskuduntzen aurkakoa delako, eta enpresarien alde eta langileen aurka dagoelako.