ANTIMILITARISMOA
7. Intsumisio Eguna izanen da Usurbilen 'Soldadutza amaitu da. Lortu dugu' lelopean.
Espainiako estatuan derrigorrezko soldadutzarako azken zozketa egin bada ere, 2.002. urtera arte soldadu behartuak egongo dira; aurten 91.288 gazte deituak izan dira Armadara. Horietatik 5.790 euskal herritarrak dira: 645 arabar, 2.163 bizkaitar, 1.984 gipuzkoar eta 997 nafar. 5.790 gazte hauetatik 5.187 aurreko urteetan joateko deituak izan ziren. Ikasketak edo beste arrazoiak medio soldadutzara joatea atzeratu zuten. 18 urte bete berriak dituzten 603 gazte izan dira deituak azkeneko zozketan. Azken datu honek Armada profesionalaren errealitate hurbila erakusten digu. Aro berri baten atarian gaude eta talde antimilitaristek garaipen bat bezala aurkeztu dute aro berri hau. Honen karietara '7. Intsumiso Eguna' antolatu du Kakitzat kolektiboak Usurbilen larunbat honetan; azaroaren 18an.
ARMADAK JARRAITZEN Du.
'Gasteizkoak' taldeak nahitaezko soldadutza bukatu izana eta armadaren profesionalizazioa Europako estatuek nahiz Estatu Batuek ezarri nahi duten ordenu berria egokitzeko xedez erabakitako politika dela irizten du, eta ez gizarteak lorturiko garaipena.
KAKITZAT-EK 11 URTE.
Kakitzat taldearen ustez intsumisioa erreferente bat izan da gizartearentzako, eta gizartean bizi diren bidegabekeriak geroz eta kemen gehiagoz aldatu daitezkeela uste du ere. Derrigorrezko soldadutza kentzea lortu bada desmilitarizazioa lortu daitekeelakoan daude Kakitzatekoak. Honela dio Lizarragak: "Usurbileko jaiaren bitartez, modu baketsuan eta arrazoia gure alde dagoelako, milaka intsumiso espetxeratu eta gogor zigortu izana salatu nahi dugu, baita espainol gobernuak garaipen hau bere egin ez dezan borrokatu ere".
DIKTADURAK UTZI ARMADA.
KEM TALDEA GOGOZ ARI DA.
KEMeko Javier Rodriguezek honela diosku: "KEM erradikala da eta Armada desagertzea du helburu nagusitzat. Nahiz eta derrigorrezko soldadutza amaituko den, helburu hau ez da negoziatzen. Armadak dirauen bitartean borroka antimilitarista ez da amaituko".
Antimilitarismoa iraganean baino indargeago dago. Antimilitaristek berek onartzen dute hau. Baina intsumisioak ekarri dituen ondorioak onuragarriak dira inondik ere. Artean, etorkizun gogorra iragartzen dute KEMekoek. Gobernu militarrak nola kuartelak hala armak ekoizten dituzten enpresen aurkako ekintzak burutuko dituztela diote. Desobedientzia zibilaren ildotik mobilizazio eta ekimen berriak sortuko diren iritzikoak dira intsumisoak.
Espainiako Gobernua ez da ergela noski. Eragozpen Legea sortu zuen eta berau baliogabetua geratu ostean Zerbitzu Zibilaren legea dauka proiektuan. Edonola ere, derrigorrezko legea ez da guztiz ezabatua. Konstituzioaren 30. artikuluaren arabera, Espainiak behar duenean, Armadak herritarrak lerrokatu ditzake gerra garaian. Armada profesionala izanagatik inor ez da gerrara joatearen arriskutik libre biziko, aixkiria .
Milenioarekin batera, soldaduzka eta OZS ordezko "zibila" dena amaitzen dira Espainiako estatuan. Bahiketak, tratu txarrak, irainak, kalte fisiko zein psikikoak eta heriotzak ere bukatzen dira milaka gazterentzat. Gaurko umeek ez dute jasan beharko sumisioa, hierarkia, eta herio-tzaren eskola basati hori. Beraientzako etorkizun libreago bat lortu dugu.
Espainiako gobernua herri garaipen hau mozorrotzen saiatuko da beraien erabakia dela esanez. Edota Europaren eskaera dela esango dute, herri garaipen hau beraiei esker lortu dela sinestarazteko. Zinikoagorik izan al daiteke?
Soldaduzka amaitzear dagoenean, politiko gehienak eskaera herrikoi honen aldera pasa dira. Baina ez da ahantzi behar, azken urte hauetan milaka intsumituk sufritutako bortizkeriaren errudunak zeintzuk diren. Bada, gerrarako 2,5 bilioi pezetaren aurrekontua onartzen duten, NATOren basakeriak apoiatzen dituzten, arma fabrikak diru publikoaz subentzionatzen dituzten, eta Alcalako presondegi militarrean intsumisoak bahiturik dituzten politikoak.
Desmilitarizazioaren gerra ez dugu oraindik irabazi, soldadutzaren bukaeraren bataila baizik. Desobedientzia zibila, injustiziaren aurkako tresna etorkizun handikoa dela erakutsi da. Honek estatuaren botereak urduri jar-tzen ditu. Borroka bide demokratiko eta pazifiko honen aurkako sorgin harrapaketa hasi da jada. Inkisidore berriak borroka bide hau erabiltzen duten taldeak kriminalizatzen eta bere kideak atxilotzen hasi dira poliziaren usteak egi borobiltzat harturik. Poliziaren inpar-tzialtasunean sinesten duen gizagaixorik ba al dago, oraindik? Estatuaren ustezko hiru botereak ideologia baten aldeko tresnak baino ez direla agerian gelditu da. Bakeaz honenbeste hitzegiten dutenek, bide baketsuak ukatzen dituztenean, bortizkeria justifikatu baino ez dute egiten. Estatuaren botereen mehatxuek ez gaituzte izutuko ordea. Desobedientzia zibila eta intsumisioa erabiltzen jarraituko dugu, per-tsonak, herriak, eta mundu libreagoak izatearren.
Espainiako Defentsa Ministerioak aldarrikatu duenez, azaroaren 8koa izan da soldadutzaren azken zozketa. Lehengo eta behin, KEMeko kideak pozten gara derrigorrezko zigor hau desagertu izanaz. Hala ere, soldadutzaren ezabapena inoiz ez dela gure helburu nagusia izan gogorarazi behar dugu. 'Gizartearen desmilitarizazioa', 'gastu militarren desagerpena' eta 'soldadutzaren apurketa'dira bilatzen ditugun xedeak. Hamarkada honetan borroka antimilitaristan izan den tresna erabilgarriena, insumisioa alegia, amaitu egingo da, baina horrek ez du esan nahi bide berriak asmatu beharko ditugunik, zaharrak berreskuratu baizik: gastu militarraren salaketa, bake heziketa, gerra enpresa eta egoitza militarren aurkako ekintza zuzenak eta bake-tsuak.
Insumisioak irakatsitako lezio garrantzitsuena hauxe da: desobedien-tziak zentzu handia du. Gaur egun ikusten dugunez, armadak gero eta itxura txarragoa dauka, batez ere managaitzok egindakoari esker. Inork ez du Armada Profesional berri horretan sartu nahi, eta ez du haien giza misioekin zerikusirik ere. Hauexek dira intsumisioaren ondorioak. Hala ere, gastu militarra eta armadak burutzen duen 'polizia lan mundiala' gero eta handiagoa da. Hortaz, borroka hasi baino ez dugu egin.
© 2008-2011 Argia.com - Komunikazio Biziagoa
Erreportajea 
